Қозоғистоннинг Олмаота шаҳри шошилинч тез ёрдам шифохонасида 18 июль куни Руслан Куликбаев томонидан уюштирилган қуролли ҳужум вақтида яраланган икки нафар полиция ходими ҳалок бўлди. Бу ҳақда шаҳар ички ишлар департаменти матбуот хизмати маълум қилди, деб хабар бермоқда Kazakhstan Today.
Қайд этилишича, 1973 йилда туғилган полиция катта сержанти Серик Абилдаев ҳамда 1992 йилда таваллуд топган полиция лейтенанти Мейрамбек Рахматуллаев ҳаётдан кўз юмди.
«Раҳбарият, фахрийлар кенгаши ва Олмаота ички ишлар департаменти шахсий таркиби Серик Абилдаев ва Мейрамбек Рахматуллаев оиласи ва яқинларига чуқур ҳамдардлик изҳор қилади», – дейилади хабарда.
Олдинроқ Олмаотадаги отишмаларда ҳалок бўлганларнинг оиласига 15 миллион тенге (45 минг доллар), жабрланганларга 5 миллион тенгедан (15 минг доллар) моддий ёрдам ажратилиши ҳақида хабар берилганди.
Изоҳ (0)