Трамп: Россияда ҳеч қандай инвестицияларим йўқ
Дональд Трамп унинг Россияда инвестициялари йўқлигини расман маълум қилди. Бу ҳақда АҚШ президентлик лавозимига Республикачилар партиясидан номзод Twitter’даги саҳифасида маълум қилди, дея хабар бермоқда «Ведомости».
Бунга Демократик партия миллий қўмитаси почта серверига бузиб кирилиши ортида Трампни қўллаб-қувватлашга уринаётган Россия турган бўлиши мумкинлиги ҳақидаги демократларнинг баёноти сабаб бўлди. Трамп аввалроқ ҳам бундай мантиқни танқид қилган ва демократлар WikiLeaks билан боғлиқ можародан эътиборни чалғитиш мақсадида унинг Россия билан алоқасига шама қилаётганлигини билдирган эди.
АҚШ Демократик партияси миллий қўмитаси почта серверига бузиб кирилганлиги ҳақида июнь ойида маълум бўлган эди. 22 июлда WikiLeaks қўмита аъзоларининг ёзишмаларини чоп этди. Улардан қўмита аъзолари бетарафлик талабларига қарамасдан, сайловолди курашида Берни Сандерс эмас, Ҳиллари Клинтонга ёрдам беришга уринганлигини кўриш мумкин.
