«Футбол қироли» Пеле Олимпиаданинг очилиш фестивалида асосий персона бўлишга яқин

Афсонавий футболчи Пеле Рио-де-Жанейро Олимпиадасининг очилиш маросимида иштирок этади. Бу ҳақда «ТАСС» UOL нашрига асосланиб хабар берди.

22 июль куни Пеле ўзи учун қадрдон бўлган Сантос шаҳрида олимпия машъаласини қабул қилиб олган. У Пеле учун атаб қурилган музейга олиб келинди ва афсона музей балконига чиқиб, машъала ва қўлларини мухлислари учун силкиб қўйди. Бироқ эстафета кулминациясида Пеле барибир иштирок эта олмади. Бунга сабаб сифатида уни 2015 йилнинг декабридан буён қийнаб келаётган соғлиғидаги муаммолар кўрсатилган.

5 август куни «Маракана» стадионида бўлиб ўтадиган Олимпиаданинг очилиш маросими сценарийси қаттиқ сир тутилаётгани учун, Пеле унда қандай ролда бўлиши аниқ бўлиб улгурмаган. UOL маълумотига кўра, Пеле очилиш маросимида баландликка кўтарилиб, Олимпиада давомида ёниб турувчи оловни аланга олдириш учун асосий номзод ҳисобланади.

Пеле ФИФА талқинига кўра ХХ асрнинг энг яхши футболчиси деб топилган. У фаолияти давомида олимпия ўйинларида иштирок этмаган бўлсада, 1999 йил Халқаро Олимпия Қўмитаси Пелени юзйилликнинг энг яхши спортчиси деб тан олган.