АҚШнинг Миннесота штатидаги Фолкон-Хайтс шаҳрида полициячи қора танли эркакни отиб ташлади. Бу ҳақда, Reuters’га асосланиб, «ТАСС» деб хабар бермоқда.
Маҳаллий вақт билан соат 21:00 да йўл полициячи ходимлари 32 ёшли Филандо Кастиленинг машинасини тўхтатди. Бироздан сўнг полициячилардан бири унга қарата ўқ узди. Эркак шифохонага етказилиб, ўша ерда оламдан ўтди.
Бир муддатдан сўнг маҳаллий Minneapolis Star нашри эркакнинг шахсини аниқлади.
Кастиле билан бирга машинада бўлган аёл воқеа акс этган видеони YouTube’га жойлаштирди. Видеода ярадор эркакни кўриш мумкин. Шундан сўнг аёл бўлган воқеани гапириб беради: унинг айтишича, полиция габарит чироқлари ўчирилгани боис машинани тўхтатган. Кастиле чўнтагидан ҳужжатларини олишга ҳаракат қилаётган пайтда полициячи унга қарата ўқ узган.
«У полициячини қуроли борлигидан огоҳлантирди, лекин ҳамёнини чўнтагидан олишини айтди, шунга қарамай, полициячи дарҳол унинг қўлига ўқ узди», — дейди аёл.
Изоҳ (0)