Халқаро футбол федерациялари уюшмаси (ФИФА) президенти Жанни Инфантино Россияда бўлиб ўтадиган ЖЧ–2018 турнири учрашувларида аёл ҳакам ишлашини таклиф қилди. Бу ҳақда «ТАСС» хабар бермоқда.
«ЖЧ–2018 турнири борасида таклифим бор. Россияда бўлиб ўтадиган жаҳон чемпионати учрашувларида аёл ҳакам ишласа яхши бўларди. ФИФА бу масала устида иш олиб бориб, имкониятларини кўриб чиқади», – деди Инфантино.
Агар Инфантинонинг таклифи қабул қилинса, жаҳон чемпионатининг финал босқичида илк бор аёл ҳакам ишлайди. Бундан аввал аёл ҳакамлар еврокубокларда ва халқаро турнирларнинг саралаш учрашувларида ишлаган.
Маълумот учун, футбол бўйича жаҳон чемпионати 2018 йилнинг 14 июнидан 15 июлига қадар Россиянинг 11 шаҳри – Москва, Санкт-Петербург, Қозон, Сочи, Нижний Новгород, Самара, Калининград, Екатеринбург, Саранск, Волгоград ва Ростон-Донда, жами 12 та стадионда бўлиб ўтади.
Изоҳ (0)