Ироқ бош вазири Ал-Фаллужа аҳолисини шаҳарни ИШИДдан озод бўлганлигини нишонлашга чақирди

Ироқ бош вазири Ҳайдар ал-Ободий Ал-Фаллужа аҳолисини шаҳарнинг ИШИД террорчилик гуруҳидан озод этилганлигини нишонлаш учун кўчаларга чиқишга чақирди. Бу ҳақда, Alsumaria телеканали маълумотига таяниб, «ТАСС» хабар бермоқда.

Телеканалнинг маълум қилишича, Ироқ бош вазири шахсан Ал-Фаллужага етиб келиб, шаҳар марказида миллий байроқни кўтарди ва унинг аҳолисини ушбу кунни уйлари ва бошпаналаридан кўча ва майдонларга чиқиб нишонлашга чақирди.

Ал-Ободий Ироқ байроғи яқин вақт ичида Ироқнинг катталиги бўйича иккинчи ўринда турувчи Мосул шаҳрида ҳам ўрнатилишини маълум қилди. Шаҳар ҳамон ИШИД томонидан назорат қилинмоқда.

26 июнь куни Бағдод Ал-Фаллужанинг экстремистлардан тўлиқ озод этилганлигини расман эълон қилди. Ҳукумат кучларининг Ал-Фаллужада террорчилар билан бир ойга яқин давом этган жанглар давомида ўн минглаб маҳаллий аҳоли шаҳардан қочиб чиқди. Тўқнашувларда бир неча минг жангари ўлдирилганлиги маълум қилинди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.