«UzReport» телеканалида Евро—2016 беллашувларини шарҳлаб бораётган актёр ва хонанда Алишер Узоқов ҳақида «Сабо» нашрида мақола чоп этилган бўлиб, унда Узоқовнинг шарҳига танқидий фикрлар ёғдирилган деб хабар берди «Даракчи» сайти.
«Сабо»да қайд этилишича, Алишер Узоқовнинг шарҳига нисбатан қолдирилган изоҳларда актёрнинг ҳаддан зиёд эҳтиросга берилиб, гол бўлган вазиятларда бақириб юбораётганлиги кўрсатиб ўтилган.
«Мухлислар Алишер Узоқовдан пастроқ овозда гапириб, бақир-чақир қилмаса, ундан яхши спорт шарҳловчиси чиқишини билдирган», — деб ёзди «Даракчи» газетаси. Танқидий фикрлар қаерда ва қай кўринишда ёзилганига ойдинлик киритилмаган.
«UzReport» шарҳловчилари ҳақида «Эрудит Спорт» газетасида ҳам мақола чоп этилган бўлиб, муаллиф Алишер Узоқов ҳақида шундай фикр қолдирган:
«Узоқовни шахсан танимайман, яқинлигим йўқ. Менга унинг кинодаги роллари маъқул бўлмаган, алоҳида кузатиб бормаганман. Бироқ футболга бўлган қизиқиши ҳақида ‘Истиқлолъда ўйнаб юрган пайтлари билардим. ‘UzReport’даги шарҳини эшитдим. Иккинчи шарҳи вақтида эса менда илиқ таассурот қолдиргани ҳақида твит ёздим. Даврон Файзиев билан тандемда мухлисни ўйинга қизиқтира олди. Футбол шарҳлаши ҳақида эшитганимда, ундан бундай шарҳ кутмагандим очиғи».
«Узоқовнинг базаси у қадар бой эмас, буниси ту
шунарли. У футбол учрашувларини узоқ йиллардан буён шарҳлаб юрган эмас, мухлис сифатида кузатган. Тажриба эса вақти билан келади. Муҳими ундаги темп, ўйинга қизиқтира олиш, футболдаги воқеалар ичига кириб кетиш каби қобилятларни ўзим учун кашф қилдим. Бу шарҳловчи учун жуда муҳим. Хатолар эса ҳар доим ҳаммада бўлади».
Маълумот учун, «UzReport» телеканали шарҳловчиларидан кимнинг шарҳи мухлисларга кўпроқ маъқул бўлаётгани юзасидан «Дарё»да сўровнома ўтказган бўлиб, унда овоз берган ўқувчиларнинг 72 фоизи Алишер Узоқовнинг шарҳини маъқуллаган.
Изоҳ (0)