Таиланд футбол ассоциацияси президенти Самйот Пумпунмуангнинг сўзларига кўра, Ўзбекистон миллий терма жамоаси 2016 йилнинг июнь ойида бўлиб ўтадиган Таиланд қирол кубоги мусобақасида қатнашишга розилик берган. Бу ҳақда «Footballchannel.asia» хабар тарқатди.
Таиланд ва Ўзбекистон терма жамоаларидан ташқари турнирда Коста-Рика, Тринидад ва Тобаго, Гаити, шунингдек, Хорватия Б терма жамоаларининг иштирок этиши ҳам кутиляпти.
«Биз бир қатор терма жамоаларни мусобақага таклиф қилдик. Ўзбекистон ва Хорватия Б термалари унда иштирок этишга розилик берди. Коста-Рика, Тринидад ва Тобаго каби термалар билан эса музокаралар давом этмоқда. Таиландгача бўлган масофа анча узоқ бўлишига қарамай, Гаити терма жамоасини ҳам турнирга таклиф қилишни истадим. Чунки Гаити президенти менинг дўстим», — деб Самйот Пумпунмуангнинг сўзларидан иқтибос келтирилган.
Bangkokpost маълумотига кўра, 28 апрель куни Таиланд пойтахтига ФИФАнинг янги президенти Жанни Инфантино ташриф буюради ҳамда мамлакат футболининг яқин келажакдаги режалари билан танишади, мамлакат бош вазири билан учрашувда бўлади.
Бу ҳақда маълум қилган Таиланд футбол ассоциацияси президенти, қўшимча тариқасида Қирол кубоги ҳақида ҳам тўхталган. Унинг сўзларига кўра, Хорватия терма жамоаси 10 июндан старт оладиган Европа чемпионатида иштирок этиши муносабати билан, Хорватия футбол федерацияси Қирол кубогига мамлакатнинг иккинчи терма жамоасини юборишини маълум қилган.
Қайд этиш керак, 2015 йилнинг февраль ойида Ўзбекистон олимпия терма жамоаси ҳам Қирол кубогида иштирок этганди. Ўша мусобақадан кейин жамоа бош мураббийи Шуҳрат Мақсудов ўз вазифасидан озод этилган, футболчи Тоҳир Шамсиддинов эса 1 йил муддатга футболдан четлатилган. Турнирдаги Жанубий Кореяга қарши ўйин вақтида рақибига очиқдан-очиқ зарбалар берган Шамсиддинов бунга қадар аввалига кореялик футболчидан, кейин эса ҳаммадан узр сўраганди.
Изоҳ (0)