Ростов-Донда ҳалокат ва 62 кишининг ўлими билан якунланган Boeing 737-800 самолётининг қўндирилиши мураккаб об-ҳаво шароитида амалга оширилди. Авиация экспертлари шароитлар ва экипаж хатти-ҳаракатларига дастлабки баҳони берди, деб ёзади «РБК».
«Парвозлар хавфсизлиги» консультация-таҳлилий агентлиги бош директори Сергей Мельниченко самолётни қўндиришга бўлган биринчи ва иккинчи уринишлар ўртасида самолёт икки соатча ҳавода бўлиб турганининг эҳтимолий сабабларини тушунтирди.
«Учувчилар об-ҳаво шароити яхшиланишини кутган бўлиши мумкин. Эҳтимол қайсидир лаҳзада об-ҳаво яхшиланган ва улар шундан фойдаланиб қолмоқчи бўлган. Бироқ сониясига 22 метр тезликда жуда кучли шамол бўлган, самолётнинг эса учдан бир қисмигина тўла бўлган. Кучли шамол эсаётган вақтда ярми бўш самолётни бошқариш қийинроқ», — дея аниқлик киритди Мельниченко.
«Ҳозир барча мутахассислар самолётнинг эсон-омон қўнишига ноқулай об-ҳаво шароити халал бергани ҳақидаги фикрга қўшилмоқда. Бизнинг маълумотларга кўра, самолётни қўндириш учун биринчи уриниш 17 м/сония тезликда шамол эсаётган вақтда амалга оширилган, иккинчиси эса бундан ҳам кучлироқ шамол вақтида бўлган. Бошқа аэропортларда шароитлар қулайроқ бўлган, экипажда эса бирорта захира аэродромига бориш ёки яна бироз кутиш учун етарлича ёқилғи бўлган. Самолёт қулаган вақтда унда яна икки соатлик парвозга етадиган ёқилғи бор эди», — дея қўшимча қилди эксперт.
Эслатиб ўтамиз, 19 март, шанба куни FlyDubai авиакомпаниясига тегишли Boeing 737-800 лайнери Россиянинг Ростов-Дон шаҳри аэропортига қўниш вақтида ҳалокатга учради. Ҳодиса оқибатида самолёт бортида бўлган барча йўловчилар ва экипаж аъзолари ҳалок бўлган. Самолёт бортидаги йўловчилардан бири ўзбекистонлик бўлган.
Изоҳ (0)