Икки нафар ўзбекистонликка Қозоғистон мукофотлари топширилди

Ўзбекистон академик доираларининг икки нафар вакили Қозоғистон халқ Ассамблеясининг 20 йиллиги шарафига «Қазақстан халқи Ассамблеясина 20 жил» юбилей медалларини олди. Бу ҳақда «Газета.uz» хабар беради.

Қозоғистон президенти Нурсултон Назарбоевнинг фармойиши билан берилган мукофотларни топшириш маросими 10 февраль куни мамлакатнинг Тошкентдаги элчихонасида бўлиб ўтди.

Маълум қилинишича, фахрий мукофотлар Ўзбекистон Фанлар академияси Тарих институтининг «Замонавий тарих ва халқаро тадқиқотлар» бўлим бошлиғининг ўринбосари, фалсафа фанлари номзоди Равшан Назаров ва Низомий номли Тошкент давлат педагогика университети «Демократик жамият қуриш назарияси ва амалиёти» кафедрасининг доценти, тарих фанлар номзоди Алишер Собировга топширилган.