Россия ташқи ишлар вазири ўринбосари Игорь Моргулов ҳамда Жанубий Корея ташқи ишлар вазирлиги махсус вакили Хван Чжун Гук телефон орқали мулоқот чоғида КХДР томонидан водород бомбаси синови ўтказилганини муҳокама қилди. Суҳбат Корея томони ташаббуси билан бўлиб ўтган. Бу ҳақда «Коммерсант.ru» хабар бермоқда.
«Икки томон ҳам КХДР расмийлари водород бомбаси синови ўтказилганини эълон қилгани муносабати билан жиддий ташвишланиш билдирди. Шимолий Кореянинг ядро салоҳиятини оширишга қаратилган ҳаракатлари БМТ Хавфсизлик кенгаши резолюциясининг қўпол равишда бузилиши эканлиги таъкидланди», — дея маълум қилинади Россия ТИВ сайтида жойлаштирилган хабарда.
Эслатиб ўтамиз, олдинроқ Россия КХДР ўтказган синовни қоралагани ҳақида хабар берилганди.
Изоҳ (0)