Одил Аҳмедов Россия чемпионатида энг кўп маош оладиган футболчилар рўйхатида 55-ўринда қайд этилди

«Sports.ru» нашри томонидан Россия чемпионатида тўп сурадиган футболчилар оладиган маош бўйича навбатдаги йил рейтинги маълум қилинди, деб хабар беради «Uff.uz».

Унга кўра, «Зенит» ҳужумчиси Халк 7 миллион евро маош билан биринчи ўринни олган. Александр Кокорин ва Эсекиэль Гарай эса 5 миллион евро маош билан 2—3-ўринларни бўлишиб олган. Тўртинчи ўрин йилига 4,5 миллион евро маош оладиган Хави Гарсияга насиб қилган.

Ушбу рўйхатдан «Краснодар» ярим ҳимоячиси Одил Аҳмедов ҳам ўрин олган. Ўзбекистон терма жамоаси сардори йилига 1,7 миллион евро маош олади ва бу борада «Динамо» футболчиси Александр Бюттнер ва «Спартак» аъзоси Евгений Макеев билан биргаликда 55-ўринни эгаллаб турибди.

Ўзбекистон терма жамоасининг яна бир аъзоси, Москванинг «Локомотив» клуби ҳимоячиси Виталий Денисов 71 футболчидан иборат рўйхатдан ўрин олмади.