«Калашников» концерни жорий этилган санкциялар туфайли АҚШда АК-47 автоматлари ишлаб чиқарилишига алоқадор эмас ҳамда ишлаб чиқаришда ёки унинг қисмларини Америка бозорларига етказиб беришда қатнашмаяпти. Бу ҳақда компания матбуот хизматига таяниб, «РБК» хабар берди.
Компаниядагилар таъкидлашича, бу Калашников автоматлари Россиядан ташқарида ясалаётган биринчи ҳолат эмас. Концерт бундай ҳолга қарши «юқори сифатлилиги билан ўз муқобилларидан фарқланиб турувчи янги буюмлар ишлаб чиқариш орқали» курашмоқчи.
Аввалроқ Американинг Kalashnikov USA компанияси АҚШда ишлаб чиқарилган Калашников автоматлари (АК-47 модели) сотила бошлаганини эълон қилган эди.
Kalashnikov USA (аввалги номи Russian Weapon Company) «Калашников» маҳсулотларининг расмий импортчиси ва дистрибьютери ҳисобланади. Бироқ 2014 йилда Вашингтон Россияга қарши киритган санкциялар туфайли унинг фаолияти хавф остида қолди. Январь ойида америкалик қуролсозлар афсонавий автоматларни ўзлари ишлаб чиқаришни бошлашини эълон қилди.
Изоҳ (0)