Бразилия полицияси Италия мафияси боссларидан бири, 30 йилдан қочиб, яшириниб юрган 56 ёшли Паскуале Скоттини ҳибсга олди. Kommersant.ru’нинг хабар беришича, мафиози Ресифи шаҳрида, Интерпол ва Бразилия полициясининг ҳамкорликдаги операцияси вақтида қўлга олинган.
Скотти Camorra мафия гуруҳининг Неаполдаги босси бўлган. 1980 йилда у 20дан ортиқ қотиллик бўйича айбдор эканлиги аниқланган, 1983 йилда ҳибсга олинган. Ҳибсга олиш вақтида юз берган отишма натижасида мафиози бир неча жароҳат олган. 1984 йил декабрида даволанаётган жойи – қамоқхона касалхонасидан қочиб кетган.
Минглаб автомобиллар текширилгани ва Италия кўчалари бўйлаб ўтказилган рейдларга қарамай, карабинерлар қочоқ мафиозни қўлга тушира олишмаган. 1991 йили у 20дан ортиқ инсоннинг ўлимида, ўқотар қуролни ноқонуний равишда сақлаш ва товламачиликда айбланиб, сиртдан озодликдан маҳрум этилган.
Бразилияда мафиози ўз ташқи кўринишини ўзгартирган. Уни 30 йил аввалги бармоқ излари орқали топишга муваффақ бўлишди. Ўзи учун янги мамлакатда Скотти оилапарвар инсон сифатида яшаган: уни фарзандларини мактабга олиб келган вақтда қўлга туширишган.
Изоҳ (0)