Яқинда Хоразм вилояти Хонқа тумани А.Баҳодирхон кўчаси 29-уйда истиқомат қилувчи фуқаро Р.Раҳимованинг Хонқа туман электр таъминоти корхонаси томонидан электр энергияси таъминотида тартибсиз равишда узилишларга йўл қўйилаётганлигидан норози бўлиб ҳудудий бошқармага қилган мурожаати юзасидан ўрганиш тадбири ўтказилди. «Хоразм ҳудудий электр тармоқлари» акциядорлик жамияти ва Хонқа туман электр таъминоти корхонасидан олинган маълумотлар ва Р.Раҳимованинг шикояти таҳлил этилганда, қайд этилган ҳолат ўз тасдиғини топди. Бу ҳақда «Biznes-daily.uz» хабар бермоқда.
Ўрганиш хулосаларида қайд этилишича, фуқаро Р.Раҳимовага Хонқа туман, А.Баҳодирхон кўчасида жойлашган «Хонқа» нимстанциясининг «Хоразм» фидерига уланган ТП-8053дан электр энергияси етказилиши маълум бўлди. «Хоразм» фидери орқали электр энергияси узатишдаги чеклашлар графиги Хонқа туман ҳокими О.Жуманазаров билан келишилиб, «Хоразм ҳудудий электр тармоқлари» акциядорлик жамияти бош муҳандиси Қ.Хажиев томонидан тасдиқланган. Ушбу чеклашлар графигига асосан «Хоразм» фидерида жуфт саналарда бир кеча-кундузда 2 соатдан 6 маротаба электр тармоғида узилишлар бўлиши белгиланган.
Лекин мазкур график Вазирлар Маҳкамасининг 2009 йил 22 августдаги «Электр ва иссиқлик энергиясидан фойдаланиш қоидаларини тасдиқлаш тўғрисида»ги қарорининг «Электр энергиясидан фойдаланиш қоидалари» иловаси 10-бўлими 150-бандига, яъни «Қувват ва электр энергияси истеъмоли бўйича чеклаш ва узиб қўйиш жадваллари истеъмолчилар томонидан ҳудудий электр тармоқлари корхонаси билан биргаликда ишлаб чиқилади, маҳаллий давлат ҳокимияти идоралари билан келишилади, «Ўзбекэнерго» давлат-акциядорлик компанияси томонидан тасдиқланади ва ягона электр энергетика тизимида электр қуввати ва энергия танқислиги пайдо бўлганда жорий этилади» деган талабларига зиддир. Оқибатда ҳудудий электр тармоқлари корхонаси томонидан қувват ва электр энергияси истеъмоли бўйича чеклаш ва узиб қўйиш жадваллари истеъмолчилар билан биргаликда ишлаб чиқилмаганлиги, узилишлар куннинг қайси даврида қанча даврийликда бўлиши тўғрисида маълумотлар ҳақида хабар қилинмаганлиги маълум бўлди.
Қолаверса, Хонқа туман электр таъминоти корхонаси томонидан ҳам узилишлар графигига риоя қилмаслик ҳолати кузатилган. Бу билан «Хоразм ҳудудий электр тармоқлари» акциядорлик жамияти ва Хонқа туман электр таъминоти корхонаси томонидан иловасининг 10-бўлим 154-банди 4-хатбошиси, яъни «электр энергиясини чеклаш жадвалларини зудлик билан жорий этиш зарур бўлганда, бу ҳақдаги билдиришнома, сутканинг вақтидан қатъи назар, чеклашнинг амал қилиши бошланишидан 1 соат олдин истеъмолчиларга етказилади» деган талабларига риоя қилинмаган. Оқибатда «Истеъмолчиларнинг ҳуқуқларини ҳимоя қилиш тўғрисида»ги қонуннинг 19–моддаси 1-қисми «Ижрочи айрим турдаги ишларни бажариш (хизматлар кўрсатиш) қоидаларида ёки шартномада белгиланган муддатда, ҳажмда ва сифатда ишни бажариши (хизмат кўрсатиши) шарт» деган талаби ва «Табиий монополиялар тўғрисида»ги қонуннинг 15-моддаси 1-қисми 3- ва 5-хатбошиси, яъни «ўз товарлари сотиб олинишида истеъмолчиларга тенг шароитлар яратиб бериш…» ва «истеъмолчиларнинг зарур ҳажмдаги ва лозим даражадаги сифатли товарларни олишдан иборат ҳуқуқлари камситилишига йўл қўймаслик» деган талаблари бузилган.
Юқоридаги қонун талабларига риоя қилмагани учун Хонқа туман электр таъминоти корхонаси бош муҳандиси Умирбек Қўчқаров Ўзбекистон Республикаси Маъмурий жавобгарлик тўғрисидаги кодексининг 178-моддаси 3-қисмига асосан энг кам иш ҳақининг 5 (беш) баравари миқдорида жаримага тортилди. Ўз навбатида, туман электр таъминоти корхонаси келгусида истеъмолчилар ҳуқуқлари бузилишига йўл қўймаслик юзасидан чора-тадбирлар кўриши зарурлиги тўғрисида огоҳлантирилди.
Изоҳ (0)