Бухоро нефтни қайта ишлаш заводининг 27 ишчисига янги уй туҳфа этилди
Бухоро вилоятининг Қоровулбозор шаҳрида ёш оилалар учун замонавий турар-жой фойдаланишга топширилди, деб хабар беради Ўзбекистон Миллий ахборот агентлиги.
Шу муносабат билан ташкил этилган тадбирда Президент раҳнамолигида аҳолини ижтимоий ҳимоя қилиш, яшаш шарт-шароитларини янада яхшилашга алоҳида эътибор қаратилаётгани таъкидланди.
Бухоро нефтни қайта ишлаш заводи маблағи ҳисобидан барпо этилган ушбу турар-жой квартиралари корхонанинг 27 нафар ишчисига туҳфа этилди. Айни кунда улар оиласи билан янги уйга кўчиб ўтмоқда.
Таъкидлаш жоиз, ўтган йиллар давомида Бухоро нефтни қайта ишлаш заводи томонидан 700 дан зиёд оилага мўлжалланган коттежлар, шунингдек, ёшлар маркази ва меҳмонхона, ёпиқ спорт мажмуаси, санъат саройи, сервис ва маиший хизмат кўрсатиш объектларини ўз ичига олган нефтчилар қўрғони қурилди. Унинг яқинида 15 гектарли кўл барпо этилди. Бу ердаги қулайлик ва имкониятлардан нафақат завод ишчилари ёки уларнинг оила аъзолари, балки бутун Қоровулбозор шаҳри аҳли баҳраманд бўлмоқда.
Корхона капитал қурилиш бўлими бошлиғи Зариф Хўжаевнинг айтишича, жорий йилда завод маблағи ҳисобидан яна битта йирик спорт мажмуаси, ишчи-хизматчилар учун ҳар бири 18 квартирали иккита уй қурилиши кўзда тутилмоқда.
