Ўзбекистон терма жамоаси Осиё ўйинларида ўз олдига қўйилган вазифани бажара олмади. Терма жамоа аламли мағлубиятга учради. Бош мураббий Миржалол Қосимов мазкур учрашув ҳақидаги фикрлари билан ўртоқлашди, деб хабар бермоқда Uff.uz.

Аслида Миржалол Қосимов шогирдлари Саудия Арабистонига қарши кечган учрашувда ёмон ўйнамади. Ўйин, ташаббус, голли вазиятлар — ҳаммаси ўз ўрнида бўлди. Бироқ омад Ўзбекистон футболчилари томонда бўлмади.

«Саудия Арабистонига қарши кечган учрашувдаги мағлубият икки ҳисса аламли, — деди Миржалол Қосимов. — Бу учрашувда жамоамиз ёмон ўйин кўрсатмади, ташаббусга эгалик қилдик, голлар киритдик. Аммо ўзимиз кутмаган томондан муаммолар келиб чиқди. Пенальтидан гол ўтказиб юбордик, аслида ҳакам ўша пенальтини қўймаслиги ҳам мумкин эди. Вазият пенальтига тортадиган эмасди. Кейин ўз дарвозамизга гол киритиб қўйдик. Камига сўнгги дақиқалардаги жарима тўпи. Балки рақиб шунақа жарима тўпларининг яна ўнтасидан фойдалана олмаслиги мумкин, лекин ўша вазиятда гол ура олди.

Мен учун ҳаммадан ҳам аламлиси — жамоадаги иштиёқни юзага чиқара олмаганимиз бўлди. Барча футболчилар бир мақсад йўлида бирлашган эди. Ҳамма ғалаба қозонишимизга ишонарди. Бир неча дақиқа ичида барчаси ўзгариб кетди. Ўйин тугаганидан сўнг кўп футболчилар йиғлади. Уларга нима деб тасалли беришни ҳам билмайсан. Мана шуниси алам қилади. Яхши ўйнаганимиз, қилинган меҳнат, урилган голлар беҳуда кетгани ўз йўлига, ҳаммасидан ҳам ишонганимизни рўёбга чиқара олмаганимиз оғир бўлди. Биз бу ўйинда енгсак бўларди. Бунинг учун керак бўлган ҳамма нарса бор эди. Аммо мағлубиятга учрадик. Демак айб ўзимизда: қаердадир хато қилганмиз».

Миржалол Қосимов Бобур Йўлдошевнинг автоголи ҳақида фикр билдирар экан, бунақаси ҳар қандай футболчи билан содир бўлиши мумкинлигини қайд этди: «Мен Бобурни нафақат яхши футболчи, балки яхши инсон деб биламан. Автогол эса футбол ўйнайдиган ҳар қандай одам билан рўй бериши мумкин. Биз Бобурни айбламаймиз, шундоқ ҳам унинг аҳволи анча оғир. Жамоамиздаги ҳар бир инсон уни тўғри тушунади. Четдан кимдир унинг устидан кулган, мазах қилган бўлиши мумкин, аммо биз у қандай ҳолатда эканини яхши биламиз. Шу билан бирга, мухлисларни ҳам тушунса бўлади. Улар жамоадан ғалаба кутган эди. Уларнинг ишончини оқлай олмаганимиз учун узр сўраймиз. Аммо ҳамма айбни Бобур Йўлдошевга юклаб, унга нисбатан турли гаплар айтилишига қаршиман. Ҳозир ҳаммадан ҳам Бобурга оғир. У мана шу оғир вазиятдан ўтиб олиши керак. Футболда шунақаси ҳам учраб туради. Дунё тан олган юлдузлар ҳам автогол киритган вақтлар бўлган».

Бош мураббий ўз интервьюсида Даврон Ҳошимовнинг бир кун олдин машғулот вақтида тўқнашиб кетиб, оёғини бироз шикастлаб олгани учун майдонга туша олмаганини маълум қилди. «Уни асрашга қарор қилдик. Саудия Арабистони таркибида 8 ва 11-рақамли футболчилар техник жиҳатдан анча кучли эди. Бобур эса Афғонистонга қарши яхши ўйин кўрсатганди, шу сабабли унга яна бир имкон бердик. Буни тақдир, пешона дейишади. Бўлиши шарт экан, бўлди. Даврон билан ҳам шундай бўлиши мумкин эди».

Миржалол Қосимов учрашувнинг бундай натижа билан якунланиши терма жамоа танлаган ҳужумкор ўйин кўрсатишнинг келажакда ҳимоя тактикаси билан ўзгартирилмаслигини таъкидлади. «Бундан кейин ҳам ҳужумкор ўйинга урғу беришда давом этамиз. Аммо бу — рақиб ким бўлишидан қатъий назар, ҳар бир ўйин фақат ҳужум остида ўтади, дегани эмас. Ҳамма жамоа­га қарши бир хил услубда ўйнаб бўлмайди. Тактика, энг аввало, ўз жамоангдаги футболчилардан, кейин эса рақиб кимлигидан келиб чиқиб танланади. Ҳужумкор ўйин учун етарли бўлган футболчилар бор экан ва рақиб ҳам бунга имкон берар экан, нима учун ҳужум қилмаслик керак? Аммо, шу билан бирга, баъзи жамоаларга қарши бош­қача тактика танлашга тўғри келади. Биз ҳар бир ўйинга индивидуал ёндашамиз ва ўйин услубини турли жиҳатлардан келиб чиқиб танлаймиз. Футболда натижа биринчи ўринда туради. Биз буни унутмаган ҳолда, энг аввало, ўша натижага ҳужумкор футбол орқали эришишга ҳаракат қиламиз», — деди бош мураббий.

Миржалол Қосимов Янги Зеландияга қарши кечган учрашувда ажо­йиб футбол намойиш қилган терма жамоа ҳақида фикр билдириб, муваффақият сирларини очди: «Ўша учрашувда терма жамоани тўлиқ таркибда йиғишга муваффақ бўлгандик. Тайёргарлик ҳам шунга яраша сентябрдан бошланди. Йиғин давомида ўйин услубини йўлга қўйдик, футболчилар билан ишладик. Ўша таркиб анчадан буён йиғилмаганди, шу сабабли ўйинга иштиёқ юқори даражада эди. Бунинг устига деярли ҳамма футболчилар яхши формада бўлиб турганди. Шуларнинг барчаси бир бўлиб, яхши ўйин кўрсатишимизга сабаб бўлди. Насиб қилса, Осиё кубогига ҳам кучли тайёргарлик кўрсак, кутилган ўйинни намойиш қила оламиз».

Мураббий кутилмаган бирор нарса рўй бермаса, мўлжалланган футболчиларнинг барчаси Осиё кубогида иштирок этиши лозимлигини таъкидлади: «Насиб қилса, бу борада ҳеч қандай муаммо бўлмайди. Шу билан бирга, футболчиларнинг спорт формасини ҳам юқори ҳолатга келтиришимиз керак. Бу ҳам амалга оширса бўладиган масала. Ўша вақтда баъзи футболчилар иштирок этадиган чемпионатда давралар оралиғидаги танаффус бўлса, бош­қалари учун мавсум якунига етган бўлади. Муҳими — футболчиларни ўз вақтида йиғиб олиб, тайёргарлик жараёнини тўлиқ ўташ. Шунда терма жамоа юқори спорт формасида мусобақага етиб келади. Ҳаммаси режадагидек кетса, бунга эриша оламиз».

Шунингдек, у октябрь ойида бўладиган йиғинга терма жамоанинг барча аъзолари йиғинга чақирилганини маълум қилиб, «4 октябрда БААга йўл оламиз. Баъзи футболчилар Тошкентга етиб келса, бошқалари тўғри Дубайга учади. Ўша ерда таркибни тўлиқ жамлаймиз. Терма жамоа БАА йиғини давомида учта муҳим ўртоқлик ўйини ўтказади. Мана шу учрашувлар давомида ўйин услубини имкон қадар шакл­лантириб олишимиз лозим. Қатар, Баҳрайн ва БАА — яхши рақиб. Уларга қарши кечадиган ўйин­ларда ўйлаб қўйилган режаларни қўллаб кўрамиз», — дея қўшимча қилди.

«Осиё ўйинларидаги муваффақиятсизлик асосий терма жамоага таъсир ўтказмайди, деб айтиш қийин. Ўзбек футболида ҳамма нарса бир-бири билан чамбарчас боғлиқ. Бир жамоанинг мағлубияти бошқасига таъсир ўтказиши мумкин ёки аксинча, бирининг муваффақияти иккинчисини руҳлантириши турган гап. Бизнинг вазифамиз — мана шу таъсирни минималлаштириб, футболчиларнинг руҳиятини мустаҳкамлашдан иборат. Шукрки, асосий жамоа сафида бир қатор тажрибали футболчилар тўп суради. Улар ёшларга ўрнак бўлиб, далда бериши турган гап.

Тайёргарлик кўриш учун олдинда вақт бор. Биз ундан унумли фойдаланишимиз керак. Осиё ўйинларида олдимизга қўйилган вазифани бажара олмадик, аммо шу билан бирга ёмон ўйин ҳам кўрсатмадик. Мана шу бошлаган ишимизни охирига етказишимиз керак. Ҳозир бизга жуда оғир. Бундай мағлубиятдан сўнг дарҳол тикланиб олиш қийин. Ўзимиздан ўтаётганини ўзимиз биламиз. Бизнинг ҳали исботлайдиган нарсамиз кўп. Муҳими — ортга чекинмаслик. Футболда ҳеч қачон ҳеч нарсани олдиндан айтиб бўлмайди. Шуниси билан ҳам у қизиқ. Нима бўлганда ҳам, Осиё кубогида мухлисларга ёқадиган, чиройли футбол кўрсатишга ҳаракат қиламиз», — дея бош мураббий ўз фикрига якун ясади.