АҚШнинг Вайоминг штатидаги 15 кишилик аҳолига эга Аладдин шаҳри 1,5 миллион долларга сотувга қўйилди, дея хабар берди Gillete News Record. Харидорга 15 та бино, жумладан почта бўлими ва 118 йилдан буён фаолият юритадиган супермаркет таклиф этилади.
Шаҳарни 1986 йилдан унга эгалик қила бошлаган эр-хотин Жуди ва Рик Бренгллар сотувга қўйди. Жуди шу вақт ичида шаҳар мэри, почта бўлими мудири ва полиция бошлиғи лавозимларида ишлашга улгурди.
Шаҳар эгаларининг айтишича, тарихий супермаркет шаҳарнинг шу вақтгача сақланиб туришига катта ҳисса қўшган. У ерда ҳар йили август ойида махсус танловга йўл олган байкерлар тўхтаб ўтади. Дўконнинг Facebook’да махсус саҳифаси ҳам бор.
Шунингдек, Аладдин шаҳрига ёндош бўлган, Бренглларга тегишли тамаддихона ва мотел ҳам сотилмоқда. Улар учун 549 минг доллар сўрашяпти.
Шаҳарга 1894 йилда Аладдин номи берилган. Унинг илк эгалари эртак қаҳрамони каби бойиб кетишга умид қилган.
Изоҳ (0)