Тошкентда бадиий гимнастика бўйича жаҳон кубоги босқичи ва Happy Caravan халқаро турнири якунланди. Бу ҳақда ЎзА хабар берди.
Халқаро гимнастика федерацияси шафелигида Ўзбекистон гимнастика федерацияси, Маданият ва спорт ишлари вазирлиги, Миллий олимпия қўмитаси ҳамкорлигида ташкил этилган нуфузли мусобақаларда Ўзбекистон, Хитой, Жанубий Корея, Япония, АҚШ, Чехия, Латвия, ЖАР, Малайзия, Мексика, Россия, Озарбайжон, Арманистон, Беларусь, Ветнам, Исроил, Ҳиндистон, Италия, Қозоғистон, Қирғизистон каби давлатлардан 100 нафардан зиёд гимнастикачи ғолиблик учун баҳслашди.
Уч кун давом этган мусобақалар сўнггида яккаликлар ва гуруҳлар ўртасида гимнастика предметлари ёрдамида машқ бажариш бўйича баҳслар ўтказилди. Гимнастикачи қизларнинг ҳалқа, тўп, булава ва тасма билан машқ бажариши, ижро маҳорати, мусиқа ва ритмни ҳис этиши, чаққон ва нафис ҳаракатлари мухлисларга завқ бағишлади.
Happy Caravan халқаро турнири гуруҳлар ўртасидаги алоҳида гимнастика предметлари ёрдамида машқ бажариш бўйича ўтказилган финал мусобақасида гимнастикачиларимиз муносиб иштирок этди. Булава ва ҳалқа ёрдамида машқ бажарган Комила Рустамова, Фарангиз Аҳмедова, Сабрина Рамазонова, Гўзал Райманова, Ирина Салех ва Карина Тоғаевадан иборат гуруҳ олтин ва кумуш медални қўлга киритди. Мазкур баҳсларда Асал Аҳмедова, Саида Давидова, Нигина Қудратуллаева, Юлия Нуштаева ва Елена Грубовадан иборат гуруҳ иккита бронза медаль билан тақдирланди.
Халқаро турнирнинг яккаликлар ўртасидаги баҳсларида иқтидорли спортчимиз Анора Давлатова булавада, Нилуфар Шомуродова тўп билан машқ бажаришда бронза медални қўлга киритди.
Happy Caravan халқаро турнирида Россия, Озарбайжон, Исроил ва Хитой терма жамоалари аъзолари ҳам ғолиб ва совриндорлар қаторидан жой олди.
Бадиий гимнастика бўйича жаҳон кубоги босқичи мусобақасида Ўзбекистон шарафини ҳимоя қилган Елизавета Назаренкова булавада машқ бажаришда бронза медаль билан тақдирланди.
Тантанали маросим таниқли санъаткорлар ижросидаги концерт билан якунланди.
Изоҳ (0)