Самарқанд шаҳрида «Мирзо Улуғбек Ўрта асрлардаги Шарқнинг буюк астрономи» мавзусида кўргазма очилди, деб хабар беради «Туркистон пресс».
Кўргазмада Мирзо Улуғбекнинг астрономия соҳасидаги илмий ишлари ҳамда яратувчанлик фаолияти билан боғлиқ маълумотлар ҳамда Ал-Хоразмий, Беруний, Ал-Фарғоний, Ибн Сино, Алишер Навоий, Мирзо Улуғбек, Нодира, Увайсий каби буюк сиймолар ҳамда Самарқанд ва Майданак номлари қўйилган кичик сайёра ва кратерлар тасвирлари намойиш этилди.
Шунингдек, кўргазмада ўзбек олими, астроном О. Турсунов томонидан яратилган Мирзо Улуғбек обсерваторияси макети, мадраса қурилиши, у ердаги ўқув жараёнлари, коинотни астрономик ускуналар орқали кузатиш тасвири туширилган миниатюралар иштирокчилар эътиборини тортди.
— Мирзо Улуғбек мадрасасида бу каби кўргазмалар 2008 йилдан буён ўтказиб келинмоқда, — дейди Регистон ансамбли раҳбари Беҳрўз Маъруфий. — Бунинг учун илмий экспедиция ҳам ташкил этилиб, изланишлар натижасида Мирзо Улуғбек ҳаёти ва фаолияти билан боғлиқ кўплаб далиллар тўпланди. Шундай материаллардан бири Ўзбекистон Фанлар академияси Беруний номидаги Шарқшунослик институтидан топилган Мирзо Улуғбек мадрасасини безаб турган юлдузли осмон харитасидир.
Изоҳ (0)