Американинг General Motors автоконцерни ўт олдириш тизимидаги камчилик туфайли Chevrolet Cobalt автомобилини ўз вақтида қайтариб олмагани учун 35 миллион доллар миқдорида жарима тўлашга рози бўлди. Бу ҳақда «ИТАР-ТАСС» хабар берди.
Аввалроқ Американинг Трассалардаги ҳаракат хавфсизлиги миллий бошқармаси GMга нисбатан 1,6 миллион дона автомобильни қайтариб олиш бўйича тергов ишини бошлаган эди.
Қонунчиликка кўра, GM транспорт департаментини автомобиллардаги ҳаракат хавфсизлиги билан боғлиқ нуқсонлар ҳақида беш кун муддат ичида хабардор қилиши, сўнг автомобилларни қайтариб олиши лозим. Автоконцерн эса ушбу талабларни бажармаганликда айбланмоқда.
Маълум бўлишича, 2005—2010 йилларда ишлаб чиқарилган Chevrolet Cobalt’нинг ўт олдириш тизимидаги носозлик туфайли автомобиль тизимлари ўчиб қолиши мумкин. Нотекис юзада ҳаракатланиш чоғида ўт олдириш қулфидаги калит буралиб кетиб, автомобиль тизимлари, жумладан хавфсизлик ёстиқлари ҳам блокировка бўлиб қолиши мумкин.
Компанияга 34 та автоҳалокатда 12 киши қурбон бўлгани ҳақида маълумот келиб тушган. Улар ушбу носозлик билан боғлиқ бўлиши мумкин.
Тузатиш: Техник сабабларга кўра нотўғри сурат тақдим этилгани учун таҳририят узр сўрайди. Сурат тўғрилаб қўйилди.
Изоҳ (0)