Ўзбекистон ошпазлар уюшмасида 9 май – Хотира ва қадрлаш кунига бағишланган маданий-маърифий тадбир бўлиб ўтди, деб хабар берди ЎзА.
Тадбирда уруш ва меҳнат фахрийлари мустақиллик, барқарорлик ва тинчлик халқимизнинг бебаҳо бойлиги экани, унинг қадрига етиш зарурлиги ҳақида сўз юритди. Миллий пазандалик ривожи йўлида хизмат қилган инсонлар хотираси ёдга олинди. Шу билан бирга, бугун пазандалик сирларини ёшларга ўргатишда фидойилик кўрсатаётган соҳа мутахассислари рағбатлантирилди.
– Шукрки, мамлакатимиз тинч, халқимиз ҳаёт даражаси кун сайин юксалиб бормоқда, – дейди Тошкент шаҳри Олмазор тумани Гуручариқ маҳалласида яшовчи Файзулло Расулов. – Юртимизга тўю тантаналар ярашади. Шундай дориломон кунларда замондошларимизнинг бахтини кўриб қувонамиз.
Тадбир доирасида ёш пазандалар ўртасида мусобақа ўтказилди. В. Успенский номидаги республика ихтисослаштирилган мусиқа академик лицейи ўқувчиларининг бадиий чиқишлари учрашувга янада файз бағишлади.
Изоҳ (0)