Мадриднинг «Реал» клуби «Валенсия»га қарши кечган ўйинда қийинчилик билан мағлубиятдан қутулиб қолди, деб ёзади Uff.uz.
Мадридликлар учун биринчи бўлимдан муаммолар бошланди. Ўз имкониятларидан фойдалана олмаган Карло Анчелотти шогирдлари 44-дақиқада Мате киритган голдан сўнг танаффусга ёмон натижа билан чиқиб кетишга мажбур бўлди.
Иккинчи бўлим бошларида мувозанат тикланди. Сўнгги вақтларда «Реал» тўпурарига айланиб бораётган ҳимоячи Серхио Рамос ҳисобни тенглаштирувчи голга муаллифлик қилди. Аммо 65-дақиқада Парехо яна «Валенсия»ни олдинга олиб чиқди. Бу голга «Реал» футболчилари фақат 90-дақиқада жавоб қайтара олди. Мадридликлар жонига яна бир бор Роналду оро кирди.
Шунингдек, Испания чемпионати 36-туридан ўрин олган «Барселона»—«Хетафе» учрашувида ҳам 2:2 дуранг натижа қайд этилган эди.
«Леванте» ҳамда «Атлетико» жамоалари ўртасидаги учрашувда эса майдон эгалари 2:0 ҳисоби билан ғалаба қозонган эди.
Шундай қилиб, дуранг натижадан сўнг «Реал» 83 очко билан учинчи ўринда қолиб кетмоқда. «Атлетико»да 88, «Барселона»да эса 85 очко бор. Аммо мадридликлар бир ўйин кам ўтказган.
Изоҳ (0)