Тошкентлик ўқувчилар «Инглиз тили билимдонлари» деб тан олинди

Халқ таълими вазирлиги томонидан умумтаълим мактаби ўқувчилари ўртасида илк бор «Инглиз тили билимдонлари» кўрик-танлови ташкил этилди. Бу ҳақда ЎзА хабар берди.

– Мазкур кўрик-танлов мамлакатимизда таълим-тарбия, хусусан, чет тилларини ўқитиш тизимида олиб борилаётган ислоҳотлар истиқболидан ёрқин далолатдир, – дейди Халқ таълими вазирлиги таълим муассасалари фаолиятини ташкил этиш бош бошқармаси бошлиғи Файзулла Аҳмедов. – Танловнинг турли босқичларида 5—9-синф ўқувчилари барча шартлар бўйича пухта билимга эга эканини намойиш этди.

Абдулла Авлоний номидаги халқ таълими ходимларини қайта тайёрлаш ва малакасини ошириш марказий институтида ўтказилган кўрик-танловнинг мамлакат босқичида ўз ҳудудида ғолибликни қўлга киритган 14 жамоа ўзаро баҳслашди.

Уч турдан иборат танлов давомида ўқувчиларнинг инглиз тилига доир билимлари синовдан ўтказилди. Жумладан, 5—6-синф ўқувчилари тест саволларига жавоб берган бўлса, 7—9-синф ўқувчилари танланган мавзу бўйича ижодий ёзма иш топширди.

Оғзаки савол-жавоб тарзида ўтган иккинчи турда 5-синф ўқувчилари географияга оид билимларини инглиз тилида ифодалашди. 6-синф ўқувчиларига муайян расм мазмунини, 7-синф ўқувчиларига тарихга доир билимларини сўзлаб бериш талаби қўйилди. 8-синф ўқувчилари инглиз тилидаги аудиоматнни тинглаб тушуниш ва гапириш маҳоратини намоён этган бўлса, 9-синф ўқувчилари видеотасвирни шарҳлаб берди.

Саҳна кўриниши шартида иштирокчиларнинг жамоавий уюшқоқлиги, инглиз тилида равон сўзлаша олиш ва рол ижро этиш маҳоратига баҳо берилди.

Қизғин ва муросасиз кечган танлов якунида умумий баллар ҳисобига кўра Тошкент шаҳри жамоаси биринчи, Фарғона вилояти вакиллари иккинчи, Бухоро вилояти жамоаси учинчи ўринни эгаллади. Қолган иштирокчилар ҳам махсус диплом ва совғалар билан рағбатлантирилди.

– Инглиз тили билимдонлари сифатида эътироф этилганимиздан жуда хурсандман, – дейди Юнусобод туманидаги 17-умумтаълим мактабининг 8-синф ўқувчиси Зилола Ҳошимова. – Мен бу танловда иштирок этган ҳар бир ўқувчини ғолиб деб атаган бўлардим. Чунки маррага етиб келганлар, аввало, ўз вилоятининг билимдонлари, қолаверса, ушбу беллашувларда тўпланган тажриба, оширилган билим келажакда, албатта, ўз мевасини беришига ишонаман.