1 май куни Тошкентда «Фавворалар сайли» ёшлар оммавий-маданий тадбирлари ўтказилди. Бу ҳақда ЎзА хабар берди.
Сайил Ўзбекистон Республикаси Вазирлар Маҳкамасининг 2014 йил 23 апрелда қабул қилинган «Тошкент шаҳрида «Фавворалар сайли» ёшлар оммавий-маданий тадбирларини ташкил этиш чора-тадбирлари тўғрисида»ги қарорига мувофиқ ўтказилди.
Давлат муассасалари, музейлар, банклар, ресторан ва кафелар ёнида, бозорларда, ўқув муассасаларида, истироҳат боғлари ва халқ сайллари ўтказиладиган жойларда бир-биридан чиройли 60 дан ортиқ фаввора ишлаб турибди. Улар атрофида барча қулайликлар мавжудлиги туфайли фавворлар жажжи болажонлар, ёшлар ва фахрийлар, пойтахт меҳмонлари билан ҳамиша гавжум. Бундай хушманзара жойларда мактаб, академик лицей ва касб-ҳунар коллежлари ўқувчилари, талабалар учун сайёр дарслар ўтказилади, учрашувлар белгиланади, келин-куёвлар ва кўплаб сайёҳлар суратга тушади.
Тантанали тадбирлар пойтахтдаги барча йирик фавворалар ёнида ташкил этилди. Уларнинг 14 тасида ёзувчилар, шоирлар, санъаткорлар, рассомлар, рақс ва театр гуруҳлари иштирокида оммавий маънавий-маданий тадбирлар бўлиб ўтди.
Тошкентнинг Хадра майдонидаги 12 метр баландликкача кўтариладиган, ранг-баранг чироқлар ёғдусида жилоланадиган фаввора олдида ўтказилган тадбирда миллий-маданий анъана ва қадриятларимизга урғу берилди. Бетакрор карнай-сурнай садолари остида миллий мусиқаларимиз янграб турди, дорбозлар ўз маҳоратини намойиш этди, қулай сўриларда оқсоқоллар қизғин суҳбатлашди.
Интернатионал Ташкент меҳмонхонаси ёнидаги фаввора олдида турфа мусиқалар янграб, санъаткорларнинг чиқишлари намойиш этилди. «Болажон» маданият ва истироҳат боғи ҳудудида жажжи болакайлар ва уларнинг ота-оналари учун зарур барча шароитлар яратилди.
Алишер Навоий номидаги Ўзбекистон Давлат академик катта театри биноси рўпарасидаги мусиқали фаввора суви замонавий опера ва мумтоз мусиқа садолари остида бамисоли камалакдек жилоланади.
– Биз бу сайлни интиқлик билан кутдик, – дейди Зафар ва Вилоят Мамажоновлар. – Кечки сайр ва фавворалар олдида ҳордиқ чиқариш ёш оиламизнинг яхши анъанасига айланган. Бугунги кунда пойтахтмизнинг барча туманларида болалар учун ўйин майдончалари мавжуд, музқаймоқ, салқин ичимликлар, турли ўйинчоқлар сотиладиган дўкончалар, яшил ҳудудлар ташкил этилган. Фарзандларимизнинг хурсандчилигидан бизнинг ҳам кўнглимиз яйрайди. Мустақиллик майдони, Симпозиумлар саройи олдида бўлиб ўтган сайлларда қатнашдик. Энди «Локомотив» маданият ва истироҳат боғига бормоқчимиз.
– Ўзбекистонда тўртинчи бор бўлишим, аммо ҳар сафар келганимда кўплаб янги бинолар, боғлар ва фавворалар барпо этилганига гувоҳ бўлмоқдаман, – дейди Жанубий кореялик меҳмон Чо Чанкл Ё. – Бу Ўзбекистонда амалга оширилаётган изчил бунёдкорлик ишларидан далолат беради. Тошкентнинг кенг ва равон кўчалари, шарқона гўзаллик уйғунлашган бинолари менда ажойиб таассуротлар қолдирмоқда. Бу ерда кечки шаҳар бўйлаб сайр қилишни, фаввораларнинг салқин шабадасидан роҳатланишни яхши кўраман. Бу галги ташрифим шундай ажойиб байрамга тўғри келганидан жуда хурсандман.
Изоҳ (0)