Ўтган ҳафта ОАВларда пайдо бўлган Samsung Galaxy S5 смартфони камераси билан боғлиқ муаммолар ҳақидаги хабар компания томонидан тасдиқланди. Бу ҳақда mail.ru хабар берди.
Қурилмани бир неча кун қўллаб кўрган баъзи фойдаланувчилар унинг камерасида ғалати носозлик юзага келганидан шикоят қилган: камера дастури интерфейсида «Warning: Camera Failed» («Диққат: камерада носозлик») деган огоҳлантириш пайдо бўлган. Телефон созламаларини заводдаги ҳолатига ўтказиб ҳам, хатоликни тўғрилаб бўлмаган.
Корея компанияси муаммо ҳақиқатда мавжудлигини расман тан олди, бироқ ушбу камчилик қурилманинг чекланган партиясидагина борлигини таъкидлади. Айни пайтда носозлик бартараф этилган. Samsung’нинг яроқсиз қурилмасига «рўпара бўлган» истеъмолчилар компания сервис марказларида телефонларни бепул алмаштириб олиши мумкин.
Galaxy S5 5,1 дюймли Super AMOLED дисплейи (1920×1080), Qualcomm Snapdragon 801 тўрт ядроли процессор, 2 Гб тезкор ва 16/32 Гб ички хотира билан таъминланган. Камераси 16 мегапикселлидир. Соатига 2800 мегаамперли аккумулятор смартфонни суҳбат режимида 21 соатгача қувват билан таъминлаб туради.
Изоҳ (0)