«Ўзбеккино» Миллий агентлиги қошидаги Ёшлар тажриба ижодий 5-студияси Ўзбекистон халқ шоири Муҳаммад Юсуфнинг 60 йиллигига бағишлаб «Бу ёруғ дунёда ўчмас чироғим» ҳужжатли фильмини суратга олди. Фильм «Туркистон» саройида шоир юбилейига бағишланган тантанали йиғилишда намойиш этилади. Бу ҳақда «Ўзбеккино» миллий агентлиги хабар берди.
Ёшлар тажриба ижодий 5-студияси директори Иззатилла Саиджабборов ҳужжатли фильм Ўзбекистон Республикаси Президентининг 2013 йил 27 декабрда қабул қилинган «Ўзбекистон халқ шоири Муҳаммад Юсуфнинг 60 йиллигини нишонлаш тўғрисида»ги қарори ижросини таъминлаш мақсадида «Ўзбеккино» Миллий агентлиги буюртмаси билан ишланганини қайд этди.
─ Халқона ва самимий шеърларида Ватанни, мустақилликни ёниб куйлаган шоирнинг ҳаёти ва ижоди ҳақида ҳикоя қилувчи фильм сценарийсини Ўзбекистон халқ шоири Сирожиддин Саид ёзиб берди. Ёш кинорежиссёр Аюб Шаҳобиддинов ва оператор Азизбек Арзиқулов тасвирга олди, ─ деди И. Саиджабборов.
Изоҳ (0)