Россия президенти Владимир Путин мамлакат Хавфсизлик кенгашининг йиғилишида сўзга чиқиб, Европанинг 18 давлати раҳбарларига юборган хатига АҚШ Давлат департаменти аъзолари муносабат билдирганлигини ғалати, деб атади. Бу ҳақда «ИТАР-ТАСС» хабар қилган.
Путин 10 апрель куни йўллаган мактубда етказиб берилган газ учун Украинанинг қарзи кўпайиб кетганлиги сабабли юзага келган мураккаб вазият батафсил кўрсатилган. Шунингдек, бўлаётган воқеалар Россия гази Европага транзит тарзда олиб ўтилишига қандай таъсир этиши мумкинлиги ҳам баён этилган. Президент муаммони ҳал қилиш бўйича бир қатор таклифлар берган.
Йиғилиш давомида Россия ташқи ишлар вазири Сергей Лавров президентнинг хати ўз эгаларига етказилганлигини маълум қилди. Бунда у мактубга биринчи бўлиб Вашингтон муносабат билдирганлигини ҳам айтиб ўтди. Хусусан, АҚШ Давлат департаменти мактубни «газ шантажи», деб атаган ва Россия ўзининг Украина билан ўрталаридаги ишларини сиёсийлаштирмаслиги, балки бозор нархларига амал қилиши лозимлигини таъкидлаган
Путин бу бўйича Лавровга жавобан бундай деган: «Бирмунча ғалати. Нима бўлганда ҳам, бировларнинг хатини ўқиш яхши эмас. Мактуб уларга эмас, балки Европадаги газ истеъмолчиларига аталган. Америкалик дўстларимиз яширинча қулоқ солишларига ҳамма кўникиб қолган; бировларнинг хатига ўғринча қараш – ножўя иш».
Орадан бир неча соат ўтиб, АҚШ Давлат департаментининг расмий вакили Жен Псаки бунга жавоб берган. У Европа мамлакатлари раҳбарларига йўлланган мактубга муносабат билдиришга АҚШнинг ҳуқуқи борлигини, чунки у Москвада очиқ тарзда эълон қилинганлигини таъкидлаган.
«Ошкора тарзда эълон қилинган хатга муносабат билдириш эса кимнингдир шахсий ёзишмаларига аралашиш ҳисобланмайди», – деди Жен Псаки.
АҚШ Давлат департаментининг расмий вакили Путиннинг хати Украинага энергия етказиб берувчиларга ҳам алоқадор эканлигини эслатган ва «шу сабабли бу муаммо бизга ҳам тааллуқли», – деган.
Изоҳ (0)