Баҳор-ёз мавсумида сув оқимларини хавфсиз ўтказиб юбориш мақсадида, жойларда дарё ўзанларини тозалаш, қирғоқларини мустаҳкамлаш тадбирлари билан боғлиқ тактик-махсус ўқув машқлари ўтказилмоқда. Бу ҳақда ФВВ матбуот хизмати хабар берди.
2014 йилнинг 8 апрель куни Қашқадарё вилоятининг Чироқчи тумани ҳудудидан оқиб ўтувчи Қашқадарё дарёсида, Хоразм вилоятининг Гурлан тумани ҳудудидаги Амударё қирғоғида, Сирдарё вилоятининг Гулистон туманидан ўтган Сирдарё дарёсининг қирғоғида ҳамда Бухоро вилоятининг Ғиждувон туманидан ўтувчи «Бош Шофиркон» канали ва Тошрабод сув тақсимлаш иншоотида ана шундай ўқув машғулотларнинг навбатдагиси ўтказилди.
Уларга жами 765 нафар Фуқаро муҳофазаси тузилмалари шахсий таркиби вакиллари ҳамда аҳоли, 68 та муҳандислик ва махсус техника жалб этилди. Профилактик тадбирлар давомида 550 куб метр тупроқ, 95 куб метр тош ва шағал ишлари бажарилди.
Режа асосида уюшқоқлик билан ўтказилган тадбирлар натижасида ўқув машғулотларидан кўзланган мақсадларга тўлиқ эришилди. Машғулот якунида амалий ишлар таҳлил қилиниб, уларни келгусида бошқа тегишли туманлардаги участкаларда ҳам давом эттирилиши юзасидан ўзаро келишиб олинди.
Изоҳ (0)