Тошкент шаҳридаги бадиий гимнастика бўйича болалар-ўсмирлар республика ихтисослашган олимпия захиралари спорт мактабида ўсмирлар ва қизлар ўртасида спорт гимнастикаси бўйича Осиё чемпионати бошланди. Мусобақанинг дастлабки кунида ўғил болалар брус, турникда машқлар бажариш, шунингдек, таяниб сакраш ва эркин машқ бажариш каби йўналишлар бўйича ўз маҳоратини намойиш этди. Бу ҳақда ЎзА хабар берди.
ЎзА маълумотларига кўра, Осиё чемпионатида қитъа мамлакатларидан 260 дан зиёд гимнастикачи, мураббий ва мутахассислар қатнашмоқда. Ўсмир йигитлар ўртасидаги мусобақаларда Ўзбекистон шарафини Темур Қодиров, Элёр Исломов, Азиз Саидумаров, Ҳамид Содиқов ва Мирафзал Фозилов ҳимоя қилмоқда.
— Осиё миқёсидаги мазкур нуфузли мусобақанинг айнан Ўзбекистонда ўтказилаётгани бежиз эмас, — дейди халқаро тоифадаги ҳакам Савита Марате (Ҳиндистон). — Ўзбекистонда нуфузли мусобақаларни ўтказиш учун барча шароит яратилган, ўзбек гимнастика мактаби қитъада ўзининг юксак мавқеига эга.
— Жамоамиз билан турли нуфузли халқаро мусобақаларда муваффақиятли иштирок этиб келяпмиз. Тошкентда ўтказилаётган Осиё чемпионатида ҳам ўз маҳоратимизни намойиш этиб, юртимизга ёруғ юз билан қайтиш истагидамиз, — дейди япониялик гимнастикачи Коко Добаши.
Эслатиб ўтамиз, Халқаро гимнастика федерацияси кўмагида Осиё гимнастика иттифоқи, Ўзбекистон гимнастика федерацияси, Маданият ва спорт ишлари вазирлиги томонидан ташкил этилган мусобақа қитъа гимнастикачилари учун жорий йил 16—28 август кунлари Хитойнинг Нанкин шаҳрида ўсмирлар ўртасида бўладиган II Олимпия ўйинларига йўлланма берадиган саралаш турнир ҳисобланади.
– Ўзбекистон, унинг тарихи ва маданияти ҳақида кўп эшитардим. Ушбу мусобақа баҳонасида шундай гўзал ва қадимий юртга келганимдан хурсандман, — дейди Шри-Ланкадан келган мураббий Ранжана Транга Веладаж. — Вақт топиб, Тошкентнинг ноёб тарихий обидалари, замонавий иншоотлари, сўлим кўча ва хиёбонларини томоша қилмоқчиман.
Чемпионат баҳслари давом этмоқда.
Изоҳ (0)