Германияда хато туфайли Гитлернинг сурати туширилган чашкалар савдога чиқарилди. Бу ҳақда Neue Westfaelische нашри маълумотига таяниб Gazeta.ru хабар берди.
Фашистлар йўлбошчисининг сурати акс этган бундай идишларни Шимолий Вестфалия ҳудудида жойлашган Zurbrüggen мебеллар тармоғидаги дўконларда учратиш мумкин эди. Дизайн муаллифи Гитлернинг расмини фашистлар ҳукмронлик қилган даврдаги эски маркаларнинг биридан олган. Идишнинг нақшларида ҳатто свастикани (учлари қайрилган хоч шаклидаги фашистлар белгиси) кўриш мумкин.
Савдо тармоқлари эгаси Кристиан Цюрбругген юзага келган мазкур нохуш ҳодиса учун узр сўради. У ушбу ҳолат «ахмоқона фалакнинг гардиши» билан бўлганини таъкидлади. Унинг сўзларига кўра, Zurbrüggen вакиллари бундай чашкаларни Хитойдаги таъминотчидан олган. Тахминларга кўра, дизайнер Гитлерни танимаган.
Гитлернинг расми туширилган чашкаларнинг умумий миқдори 5 мингтани ташкил этади. Чашкаларни очиб, савдо шохобчаларига тарқатиш жараёнида мазкур хато сезилмаган. Маҳсулот айни пайтда савдодан олиб ташланди. Хато топилгунига қадар 175 дона чашка сотилиб улгурган. Харид қилинган идишларни қайтарганлар учун 20 евролик сертификат ваъда қилинди.
Изоҳ (0)