Ijtimoiy tarmoqlarda Toshkentning Mirobod tumanidagi Matbuotchilar uyi sotilgani va buzilayotgani haqida xabarlar tarqaldi. Holat yuzasidan Qurilish va uy-joy kommunal xo‘jaligi vazirligi izoh berdi.
Maʼlum qilinishicha, mazkur obyekt va unga tutash hududda zamonaviy media-shaharcha tashkil etish maqsadida rekonstruksiya ishlari amalga oshirilmoqda.
Qayd etilishicha, prezident qarori va hukumat qaroriga asosan ushbu rekonstruksiya ishlari bo‘yicha arxitektura-rejalashtirish topshirig‘i ishlab chiqilgan.
“Arxitekturaviy qiyofasini yaxshilash maqsadida hamda shaharsozlik qoidalari bilan Matbuotchilar uyi binosini zamon talablari asosida loyiha ishlab chiqilib, tasdiqlangan”, deyiladi xabarda.
Qo‘shimcha qilinishicha, hozirda obyektning beton-panel ko‘rinishidagi qismlari demontaj qilinib, karkas holatiga keltirilgan.
“Kelgusida Matbuotchilar uyi binosini energotejamkor, zamonaviy texnologiyalar bilan jihozlash, qulay shart-sharoitlar yaratish hamda zamonaviy ko‘rinishga olib kelish maqsad qilingan”, deyilgan izohda.
Matbuotchilar uyi haqida
Matbuot uyining umumiy maydoni 0,82 gektar bo‘lib, bino-inshoot qismi 18 142 metr kvadratni tashkil etadi. Mazkur obyekt 2018-yilning aprel oyida ham sotuvga qo‘yilgan edi. O‘shanda Toshkent shahriga yangi tayinlangan Jahongir Ortiqxo‘jayev binoning auksion savdosida sotilishini to‘xtatgan edi.
Keyinchalik 2019-yil noyabrida Toshkent shahri markazida joylashgan Matbuot uyi binosi 18,75 milliard so‘m narx bilan ikkinchi marta auksionga qo‘yilgan. Ammo bu ma’lumot ochiq auksion saytidan olib tashlangan. 2021-yilning noyabr oxirlarida Davlat aktivlarini boshqarish agentligi Matbuot uyining davlat aktivlari bo‘yicha ommaviy savdo jarayonlari boshlanganini e’lon qilgandi.
2021-yilning dekabr oyida Matbuot uyining ma’muriy binosi sotilmaydigan bo‘lgani haqida xabar berilgandi. 21-dekabr kuni prezident matbuot kotibi Sherzod Asadov bir guruh bosma matbuot nashrlari bosh muharrirlari bilan uchrashgan. Unda bosma matbuot — gazeta va jurnallar faoliyatiga oid muammolar, yangi takliflar muhokama qilingan. Sherzod Asadovning ma’lum qilishicha Matbuot uyi binosi uzil-kesil sotuvdan olingan. Bino kelgusida ommaviy axborot vositalari, jumladan, bosma nashrlarga qoldiriladi.
Izoh (0)