Farg‘ona viloyatida bola o‘g‘rilari aniqlangani to‘g‘risida xabarlar tarqaldi. Viloyat IIB ushbu xabarlar asossiz va haqiqatdan yiroq ekanini ma’lum qildi.
Ijtimoiy tarmoqlarda yosh bola mashina yukxonasiga solinib, harakatlantirilgani aks etgan video ham tarqalgandi. Mazkur video bo‘yicha ham o‘rganish ishlari olib borildi.
Ma’lum bo‘lishicha, 14-may kuni Qo‘qon shahar Obodyurt ko‘chasida yashovchi voyaga yetmagan bola M.M. ushbu mahallada turar joyga ega bo‘lgan qo‘shnisi M.A.ga tegishli uyning devor va oynasiga tosh otib sindirgan. Buni ko‘rgan M.A. bolani qo‘rqitib qo‘yish maqsadida o‘ziga tegishli Nexia-2 yukxonasiga solib avtomashinani harakatlantirgan.
Shu paytda bolaning onasi V.T. ko‘chaga chiqib, mashinani to‘xtatib, farzandini mashinadan tushirib olgan hamda o‘rtada o‘zaro janjal kelib chiqqan.
Mazkur holat yuzasidan fuqaro M.A.ga nisbatan Ma’muriy javobgarlik to‘g‘risidagi kodeksning 183-moddasi tartibida hujjatlar rasmiylashtirilib, tegishli sud organiga yuborish chorasi ko‘rilgan.
“Fuqarolardan vahima va sarosimaga tushmasliklarini hamda ishonchsiz, tekshirilmagan ma’lumotlarni tarqatmasliklarini so‘raymiz”, — deyiladi IIB xabarida.
Bundana avval Surxondaryoda tojikistonlik bola o‘g‘rilari ushlangani haqidagi xabarlar rad etilgandi.
Izoh (0)