Jizzax viloyati IIB Zarbdor tumanida yuk mashina haydovchisi “KamAZ”da Spark avtomobili va savdo do‘koniga shikast yetkazgani yuzasidan ma’lumot berdi.
Qayd etilishicha, 28-may kuni soat 01:19 larda Zarbdor tumani “Ravot” MFYda joylashgan savdo do‘koni ish yurituvchisi viloyat IIBning 102 xizmatiga qo‘ng‘iroq qilib “KamAZ” rusumli yuk avtomashinasi egasi savdo do‘konini buzib tashlaganini maʼlum qilgan.
Holat yuzasidan olib borilgan tergovga qadar tekshiruvlar davomida Zomin tumani “Nurlikent” MFYda yashovchi 26 yoshli T.Sh. “KamAZ” rusumli yuk avtomashinasini mast holda savdo do‘koni oldiga boshqarib kelib, do‘kon yonida turgan 24 yoshli H.R va uning sherigi U.O. bilan o‘zaro tortishib qolgani aniqlangan.
Natijada fuqaro H.R. haydovchining yuz qismiga bir marotaba urib, tan jarohati yetkazgan. Shundan so‘ng T.Sh. jahl ustida o‘zi boshqaruvidagi yuk avtomashinasiga o‘tirib, uni haydab, shu yerda turgan H.R.ga tegishli Spark rusumli avtomashinaning orqasidan urib yuborib, avtomashina va savdo do‘koniga moddiy zarar yetkazgan.
Hodisa sodir bo‘lgan joy tergov-tezkor guruhi tomonidan ko‘zdan kechirilib, hozirda tergovga qadar tekshiruv davom etmoqda. Tergov natijalariga ko‘ra ushbu voqea ishtirokchilarining hatti-harakatlariga huquqiy baho beriladi, — deyiladi xabarda.
Aprel boshlarida Qashqadaryo viloyati Shahrisabz shahrida ikki mashina bir-biriga yo‘l bermasligi ortidan janjal sodir bo‘lgani, Toshkentda yo‘l talashib janjallashgan Spark haydovchisining mashinasidan psixotrop dorilar topilgani to‘g‘risida xabar berilgandi.
Izoh (0)