“Daryo”da “Sud prokurorsiz o‘tdi, sudlanuvchi sudyaga ‘otvod’ berdi: Olmazor tuman sudida noodatiy holat kuzatildi”, sarlavhali maqola e’lon qilingan bo‘lib, unda 29-may kuni davom etgan sudning navbatdagi majlisidagi noodatiy holatlar tilga olingandi. Toshkent shahar sudlari axborot xizmati mazkur maqolaga munosabat bildirdi.
Jinoyat ishlari bo‘yicha Olmazor tuman sudida Jinoyat kodeksining 168-moddasi 4-qismi “a”, “v” bandlari va boshqa moddalari bilan ayblanayotgan J.Bahodirov, A.Alimjonov va H. Mahamadjonovga oid jinoyat ishi mazmunan ko‘rib chiqilmoqda. Sud majlisi 2024-yil 29-mayda davom ettirilib, ish yuzasidan jabrlanuvchilar soni 400 nafarga yaqinligi sababli ro‘yxat asosida 40 nafar jabrlanuvchi sud majlisiga chaqirtirilgan. Shu kuni sud majlisiga ommaviy axborot vositalari vakillari kelib, raislik qiluvchidan sud jarayonini tasvirga olishni so‘rashgan. Sud ushbu holat yuzasidan taraflar fikrini so‘rab, ikki nafar sudlanuvchi norozilik bildirgani sababli jarayonni tasvirga olishni rad qilish to‘g‘risida ajrim qilgan. Biroq ommaviy axborot vositalari muxbirlariga sud majlisida ishtirok etishga ruxsat berilgan.
Bundan tashqari, sudda sudlanuvchi J.Bahodirov raislik qiluvchidan oldingi sud majlisida kiritgan iltimosnomalari yuzasidan chiqarilgan ajrim nusxasini berishni so‘ragan. Raislik qiluvchi unga ushbu ajrimlar Jinoyat-protsessual kodeksining 423-moddasiga asosan sud majlisi bayonnomasida qayd etilganini, alohida hujjat tarzida rasmiylashtirilmasligini ma’lum qilib, shu kungi sud majlisida jabrlanuvchilar so‘roq qilinishini tushuntirgan.
Shundan so‘ng sudlanuvchi “jabrlanuvchilarga agar qamoqdan chiqsa, zararni qoplashi mumkinligini tushuntirayotganida raislik qiluvchi uning fikrini bo‘lgani”ni vaj qilib, raislik qiluvchini rad qilish to‘g‘risida og‘zaki iltimosnoma bilan murojaat qilgan.
Ushbu iltimosnoma yuzasidan taraflar, shu jumladan, davlat ayblovchisining fikri tinglanib, Jinoyat-protsessual kodeksining 76-moddasida nazarda tutilgan rad qilish uchun asoslar yo‘qligi bois ushbu raddiyani rad qilish to‘g‘risida alohida xonada ajrim chiqarilib, sud majlisida e’lon qilingan. Shu kuni sudga kelgan barcha jabrlanuvchilar so‘roq qilinib, sud majlisi boshqa kunga qoldirilgan, — deyiladi mas’ullar izohida.
Qo‘shimcha qilinishicha, Jinoyat-protsessual kodeksi 497-1-moddasiga ko‘ra, birinchi instansiya sudining sud muhokamasi vaqtida chiqarilgan ajrimlari ustidan shikoyat bildirish, hukm ustidan shunday harakatlar sodir etish bilan bir paytning o‘zida amalga oshirilishi mumkinligi ma’lum qilinadi.
Izoh (0)