Arxeologlar Peru shimolidagi Barranka provinsiyasida 3,5 ming yillik qadimiy shahar qoldilarini topdi. Bu haqda BBC xabar berdi.
Shahar nomi Peñico deb atalgan. U Tinch okeanining sohilbo‘yi aholisini And tog‘lari va Amazonka havzasida yashovchilar bilan bog‘laydigan asosiy savdo markazi bo‘lgan.
Peru poytaxti Limadan 200 km shimolda joylashgan bu shahar dengiz sathidan taxminan 600 metr balandlikda qurilgan. Unga miloddan avvalgi 1800 va 1500-yillar orasida asos solingan deb taxmin qilinmoqda. O‘sha davrda Yaqin Sharq va Osiyoda dastlabki sivilizatsiyalar gullab-yashnagan. Tadqiqotchilarning ta’kidlashicha, kashfiyot Amerikaning eng qadimgi sivilizatsiyasi — Karal shahrining taqdiriga oydinlik kiritadi.
Taqdim etilgan dron tasvirlarida tosh va loydan qurilgan binolar qoldiqlari aks etgan. Hududda 8 yil davomida olib borilgan tadqiqotlar natijasida 18 ta inshoot, jumladan, marosim ibodatxonalari va turar joy majmualari topilgan. Binolarda tadqiqotchilar marosim buyumlari, odam va hayvonlarning loydan yasalgan haykallari, munchoq va dengiz chig‘anoqlaridan yasalgan marjonlarga duch kelgan.
Peñico Amerika qit’asidagi eng qadimgi sivilizatsiya sifatida tan olingan Karal yaqinida joylashgan. Karal Peruning Supe vodiysidagi 5 ming yillik sivilizatsiya sanaladi.
Karalda 32 ta yodgorlik, jumladan, yirik piramida inshootlari, murakkab sug‘orma dehqonchilik va shahar manzilgohlari mavjud. U Hindiston, Misr, Shumer va Xitoydagi boshqa qiyosiy sivilizatsiyalardan alohida rivojlangan deb ishoniladi.
Arxeolog Rut Shedi Peñico va Karal qazishmalari bo‘yicha so‘nggi tadqiqotlarga rahbarlik qilgan. Uning aytishicha, topilma Karal sivilizatsiyasi taqdiri haqida muhim ma’lumotlar taqdim etadi.
“Peñico sohilbo‘yi, tog‘li hududlar va o‘rmon aholisi bilan savdoni amalga oshiruvchi strategik hududda joylashgan”, dedi doktor Shedi.
Peruda Amerikaning ko‘plab eng muhim arxeologik topilmalari, jumladan, And tog‘larida Machu-Pikchuning Inka qal’asi va toshga o‘yilgan sirli Nazcha chiziqlari topilgan.
Izoh (0)