Hindiston hukumati mamlakatdagi musulmonlarini noqonuniy ravishda Bangladeshga deportatsiya qilishda ayblanmoqda. Bu haqda The Guardian xabar berdi.
So‘nggi haftalarda minglab odamlar, asosan musulmonlar, “noqonuniy muhojirlar” deb gumon qilinib, politsiya tomonidan butun Hindiston bo‘ylab hibsga olingan. Ularning ko‘pchiligi tegishli huquqiy jarayondan mahrum qilingan va chegaradan o‘tib, qo‘shni musulmonlar yashaydigan Bangladeshga jo‘natilgan.
Huquqshunoslar va deportatsiya qilinganlarning so‘zlariga ko‘ra, noqonuniy deportatsiya qilinganlar orasida Hindiston fuqarolari ham bor. Ta’kidlanishicha, deportatsiyaga qarshilik ko‘rsatishga uringanlar Hindiston chegara xavfsizlik kuchlari tomonidan qurol bilan tahdid qilingan.
O‘shandan beri 200 ga yaqin odam Bangladesh chegarachilari tomonidan Hindiston fuqarolari ekani aniqlangandan so‘ng Nyu Dehliga qaytarilgan. Ularning ba’zilari uylariga borish uchun xavfli hududlar bo‘ylab bir necha kilometr piyoda yurishga majbur bo‘lgani aytilgan.
“Hindiston tegishli qonuniy tartib-qoidalarga rioya qilish o‘rniga, asosan musulmonlar va o‘z mamlakatidagi kam ta’minlangan aholini hech qanday roziliksiz Bangladeshga siqib chiqarmoqda. Hindistonning bu harakati milliy va xalqaro huquqqa ziddir”, dedi Bangladeshning Odhikar inson huquqlari tashkiloti katta ilmiy xodimi Taskin Fahmina.
Bangladesh tashqi ishlar vazirligi Hindiston rasmiylariga odamlarni maslahatlashmasdan va tekshirmasdan chegaradan o‘tkazishni to‘xtatishga chaqiruvchi xatlar yozganini ma’lum qilgan. Ammo bu xatlar javobsiz qolgani aytilgan.
Hukmron hind millatchi Bharatiya Janata partiyasi (BJP) hukumatining “noqonuniy bangladeshliklar”ga qarshi kuchayib borayotgan jazo choralari aprel oyida Hindiston tomonidan boshqariladigan Kashmir viloyatida islomiy jangarilar hujumi oqibatida kuchga kirganini ma’lum qilgan. O‘shanda 25 ta hind sayyohi va gid halok bo‘lgan edi. Shundan so‘ng BJP hukumati “begonalarni” chiqarib yuborishni boshlagan edi.
Hukumatdagi 11 yillik faoliyati davomida BJP hukumati mamlakatning 200 million musulmonini ta’qib qilish va huquqlaridan mahrum qilishda ayblangan edi. So‘nggi haftalarda musulmonlarni deportatsiya qilish shimoli-sharqiy Assam shtatida sodir bo‘lgan. Rasmiylar so‘nggi kunlarda hibsga olingan 100 ga yaqin odam bedarak yo‘qolganini ma’lum qilgan.
Poytaxt Dehli, shuningdek, Gujarat, Rajaston va Maxarashtra shtatlaridan ham yuzlab odamlar, asosan musulmonlar deportatsiya qilingan. Gujaratda politsiya 6 500 dan ortiq “Bangladesh fuqarolari”ni qo‘lga olganini da’vo qilgan. Keyinchalik ularning atigi 450 tasi noqonuniy deb topilgani e’lon qilingan. O‘tgan hafta Bangladesh chegarachilari Mumbayda politsiya tomonidan olib ketilgan va deportatsiya qilingan 4 nafar musulmon erkakni G‘arbiy Bengaliya shtatidan kelgan hindistonlik mehnat muhojirlari ekani aniqlangach, ortga qaytargandi.
Izoh (0)