Isroilning 2023-yil oktyabrida G‘azoga qarshi boshlagan urushi oqibatida halok bo‘lgan falastinliklar soni 60 mingdan oshdi. Ularning qariyb 150 nafari ocharchilikdan vafot etgan. Bu haqda Al Jazeera xabar berdi.
G‘azo Sog‘liqni saqlash vazirligining ma’lumotiga ko‘ra, urush shu kungacha 60 034 kishining hayotiga zomin bo‘lgan.
So‘nggi xabarlar G‘azoda ocharchilik eng og‘ir bosqichga kirganini ko‘rsatmoqda. BMT homiyligidagi global ocharchilikni baholovchi IPC tashkilotining ma’ruzasida aytilishicha, hududda oziq-ovqat tanqisligiga chora topib bo‘lmaydi.
Al Jazeera nashrining xabar berishicha, harbiy harakatlarda “taktik pauza” e’lon qilinganiga qaramay, 30-iyul tongidan beri 83 falastinlik, jumladan, 33 nafar gumanitar yordam olmoqchi bo‘lgan shaxs halok bo‘lgan. Mahalliy aholi Isroil kuchlari tank va dronlar yordamida hujum uyushtirganini bildirgan. G‘azodagi “eng qonli kun”lardan biri aynan shu sana bo‘lgani ta’kidlanmoqda.
Shu bilan birga, G‘azo aholisi orasida ocharchilik va oziq-ovqat yetishmovchiligi tobora kuchaymoqda. IPC hisoboti shuni ko‘rsatadiki, aholining 1/3 qismi bir necha kunlab ovqatsiz iste’mol qilmayapti. Ayniqsa G‘azo shahri va janubiy hududlarda ocharchilik darajasi juda oshib ketgan.
2024-yil aprelidan 2025-yil iyul o‘rtalarigacha 20 mingdan ortiq bola o‘tkir oziq-ovqat yetishmovchiligi bilan shifoxonalarga yotqizilgan, ularning 3 mingdan ortig‘i juda og‘ir holatda. BMT bosh kotibi Antoniu Guterrish vaziyatni “insoniyat uchun fojiali halokat” deb baholab, yordam yetkazilishiga to‘sqinlik qilmaslikni qat’iy talab qilmoqda.
“Bu haqiqat. G‘azodagi falastinliklar tarixdagi eng og‘ir gumanitar inqirozlardan birini boshdan kechirmoqda. Yordam to‘lqini uzluksiz va to‘siqlarsiz yetkazilishi kerak. Bu dahshat darhol to‘xtatilishi lozim”, degan Guterrish.
U shuningdek, doimiy o‘t ochishni to‘xtatish, barcha asirlarni ozod qilish va insonparvarlik tashkilotlariga anklavga to‘siqlarsiz kirish imkoni berilishini talab qilgan. G‘azo Sog‘liqni saqlash vazirligi ma’lumotiga ko‘ra, sektorda urush boshlanganidan buyon 147 kishi, jumladan 88 bola ochlikdan vafot etgan.
BMT ayollar agentligi UN Women rahbari Sima Bahous ham G‘azodagi 1 million ayol va qiz bolalar ocharchilik bilan hayot o‘rtasida “aql bovar qilmaydigan tanlov” qilishga majbur bo‘layotganini ta’kidlagan.
Isroil kuchlari anklavda “vaqtinchalik tinchlik” o‘rnatganidan keyin, bir qator davlat va tashkilotlar, jumladan Buyuk Britaniya G‘azoga birinchi marta havodan gumanitar yordam tashlagan.
London bu yordamning qiymati yarim million funt sterling atrofida ekanini bildirgan. Britaniya bosh vaziri Kir Starmer 29-iyul kuni Isroil G‘azodagi urushni tugatmasa, sentyabrda Falastin davlati mamlakat tomonidan tan olinishini e’lon qilgan.
Fransiya ham 40 tonnalik gumanitar yordamni G‘azoga havo orqali yetkazishni rejalashtirganini ma’lum qilgan. Biroq inson huquqlari tashkilotlari havo orqali yordam tashlash samarasiz va xavfli ekanini, chegaralarni ochish zarurligini yana bir bor eslatmoqda.
Sektorda asosan go‘daklar ochlikdan jiddiy aziyat chekmoqda
G‘azodagi shifokorlar go‘daklarning holati haqida og‘riqli ma’lumotlar bermoqda. Nasser shifoxonasi bolalar bo‘limi rahbari Ahmad Al-Farro aytishicha, bolalar mushak va yog‘ to‘qimalarisiz, qoq suyak bo‘lib qolgan.
Ma’lumot uchun, oziq-ovqat yetishmovchiligi chaqaloqlarda markaziy asab tizimining shakllanishiga putur yetkazadi, keyinchalik aqliy rivojlanish, o‘qish, yozish qobiliyatiga salbiy ta’sir ko‘rsatadi. Shuningdek, ruhiy tushkunlik va xavotirlik kuchayadi.
“Chegarasiz shifokorlar” tashkiloti vakili Tanya Haj Hassan shunday dedi:
“Ovqat yetkazilganidan keyin ham muammo bartaraf bo‘lib qolmaydi. Ocharchilik organizmning barcha funksiyalarini ishdan chiqaradi. Xususan, yurak, ichak, jigar, hatto ko‘z va suyaklarga zarar yetadi. Bolalar hatto qayta oziqlantirilayotganida ham yurak yetishmovchiligi, sepsis, og‘ir elektrolit buzilishlaridan vafot etmoqda”.
Izoh (0)