Turkiya prezidenti Rajab Toyyib Erdo‘g‘on Isroil bosh vaziri Binyamin Netanyaxu G‘azodagi genotsidda Gitlerni ortda qoldirganini ta’kidladi. Bu haqda Daily Sabah xabar berdi.
Erdo‘g‘on bu fikrlarini Istanbulda bo‘lib o‘tayotgan 17-xalqaro mudofaa sanoati yarmarkasi (IDEF—2025) ochilish marosimida ma’lum qilgan.
Prezident Turkiyaning maqsadi imkon qadar tezroq G‘azoda o‘t ochishni to‘xtatish ekanini aytib, Isroilni yana bir bor sektorga gumanitar yordam kiritishga chaqirdi.
Xalqaro miqyosda o‘t ochishni to‘xtatish chaqiriqlariga qaramay, Isroil armiyasi 2023-yil oktyabr oyidan beri falastinliklarga qarshi genotsidni davom ettirib keladi. U 59 mingdan ortiq falastinlikning, aksariyat ayollar va bolalarning o‘limiga sabab bo‘ldi. Tinimsiz bombardimonlar anklavni vayron qildi, sog‘liqni saqlash tizimini jar yoqasiga olib keldi va ocharchilikka yo‘l ochib berdi.
Xalqaro jinoiy sud 2024-yilning noyabr oyida Netanyaxu va sobiq mudofaa vaziri Yoav Gallantni G‘azodagi harbiy va insoniyatga qarshi jinoyatlar uchun hibsga olishga order bergan. Bundan tashqari sud Isroilni anklavda genotsid uyushtirganlikda ayblab, javobgarlikka tortgan.
NATOga a’zo hisoblangan Turkiya Falastinning azaliy ittifoqchisi bo‘lib kelgan. Mamlakat Isroil hujumlarini urush boshlanganidan beri tanqid qilib keladi. 2024-yil may oyida Anqara Isroil bilan barcha savdo hamkorligini to‘xtagan. Gumanitar yordam ko‘rsatishdan tashqari, Turkiya hukumati xalqaro tashkilotlarni, jumladan BMT, NATO va Islom hamkorlik tashkilotlarini Isroilni jilovlashga undab kelgan.
Izoh (0)