Sanitariya-epidemiologik osoyishtalik va jamoat salomatligi qo‘mitasi yangi xavfli virus tarqalgani haqidagi xabarlarni rad etdi.
Ijtimoiy tarmoqlarda Xitoyda HKU5-CoV-2 nomli yangi virus aniqlangani to‘g‘risidagi xabarlar tarqalgandi. Bu virus COVID-19 dan ham xavfliroq ekani, yangi pandemiyaga sabab bo‘lishi mumkinligi aytilgandi.
“Ushbu xabarlar Xitoy sariq matbuotida chop etilgani, lekin kasallik to‘g‘risida Xitoy hamda JSST rasman e’lon qilmaganini ma’lum qilamiz”, deyiladi qo‘mita xabarida.
Sanepidqo‘m O‘zbekistonda epidemiologik vaziyat barqarorligini alohida qayd etdi va ijtimoiy tarmoq faollarini tasdiqlanmagan yolg‘on axborot tarqatganlik uchun javobgarlik belgilangani to‘g‘risida ogohlantirdi.
May oyining oxirlarida koronavirusning yangi to‘lqini dunyoni qamrab olmoqda, degan mazmundagi xabarlar tarqalgandi. Sanitariya-epidemiologik osoyishtalik va jamoat salomatligi qo‘mitasi raisi birinchi o‘rinbosari Nurmat Otabekov shu yil mart oyida koronavirusning Xitoyda aniqlangan NB.1.81 shtammi ba’zi mamlakatlar bo‘ylab tarqalayotgani haqida ma’lumotlar borligi, lekin COVID-19 ning yangi to‘lqini dunyoni qamrab olmoqda, degan xabarlar asossizligini bildirgandi.
2025-yil boshlarida esa O‘zbekistonda o‘tkir respirator virusli infeksiyalar avj olgani haqida xabarlar tarqalgandi. Nurmat Otabekov xavotirlanishga asos yo‘qligini, mamlakatda mavsumiy respirator kasalliklar tarqalishi bilan bog‘liq vaziyat barqarorligini ma’lum qilgandi.
Izoh (0)