Oliy Majlisning bola huquqlari bo‘yicha vakili Surayyo Rahmonova 24-iyul kuni Toshkent viloyatining Angren shahrida bo‘lib, zo‘ravonlik qurboni bo‘lgan 15 yoshli qiz S.Y. bilan bog‘liq vaziyatni o‘rgandi.
Bolalar ombudsmani matbuot xizmatining xabar berishicha, Surayyo Rahmonova dastlab Angren shahar bolalar shifoxonasiga kelib, qizning umumiy ahvoli va davolanish jarayonini ko‘zdan kechirdi, boladagi kasalliklarning kechishi va muolajalarga oid tibbiy hujjatlar bilan tanishdi. Voyaga yetmagan S.Y. bilan individual suhbatlashib, uning fikrini o‘rgandi.
“Ta’kidlash joiz, shifokorlar tomonidan S.Y.dagi kasalliklarni (o‘tkir artrit, ikki tomonlama bronxopnevmoniya, oqsil energetik yetishmovchilik, anemiya og‘ir darajasi, sepsis) davolash uchun barcha zaruriy tibbiy choralar ko‘rilmoqda. Bolada mavjud qayd etilgan kasalliklar surunkali tusga ega bo‘lib, ularning hech biri jinoyat hodisasi oqibatida yuzaga kelmagan”, deyiladi xabarda.
S.Y.ga nisbatan sodir etilgan holat yuzasidan 9-aprelda jinoyat ishi qo‘zg‘atilgani, dastlabki tergov harakatlari ma’lum qilingandi. Bolalar ombudsmani dastlabki tergov uchun mas’ullarga voyaga yetmagan jabrlanuvchi bilan bog‘liq protsessual va tergov harakatlarni olib borishda bolaning qo‘shimcha stress va ruhiy travma olishiga yo‘l qo‘ymaslik hamda malakali pedagog va psixolog ishtirokini ta’minlash zarurligini bildirgan.
Surayyo Rahmonova o‘rganish davomida Ijtimoiy himoya milliy agentligining Angren shahar “Inson” ijtimoiy xizmatlar markazi mutasaddilari bilan ham uchrashib, mazkur keys bo‘yicha amalga oshirilgan ijtimoiy, psixologik ko‘mak choralari borasida suhbatlashgan.
Qayd etilishicha, “Inson” markazi mutaxassislari S.Y. va uning oilasi bilan uzoq muddat davomida tizimli ish olib borib, murakkab vaziyatda bo‘lgan bolani himoyalash va reabilitatsiya qilish hamda oilaga ijtimoiy ko‘mak ko‘rsatish bo‘yicha davomli kompleks choralar ko‘rmoqda.
“Mazkur holat yuzasidan ishonchli bo‘lmagan, haqiqatga zid manbalarga murojaat qilishdan tiyilgan holda, faqat mutasaddi davlat organlarining rasmiy axborotlariga tayanishga chaqiramiz. Har qanday asossiz ma’lumotning tarqalishi bola manfaatlariga putur yetkazadi”, deya ogohlantirdi bolalar ombudsmani.
Ijtimoiy tarmoqlarda ushbu qiz bilan bog‘liq holat doirasida uning hayotini saqlab qolgan shifokorga nisbatan shaxsiy ma’lumotlarni tarqatgani uchun prokuratura jinoyat ishi qo‘zg‘atmoqchi ekanligi haqida xabarlar tarqalgandi. Bosh prokuratura mazkur xabarlar mutlaqo asossiz ekanligi, haqiqatga to‘g‘ri kelmasligini ma’lum qilgan.
Izoh (0)