Xitoyning China State Construction Engineering Corporation kompaniyasi mablag‘lari hisobiga Toshkentda 200 kilometr yo‘l ta’mirlanib, to‘rtta yo‘l o‘tkazgich quriladi. Bu haqda poytaxt hokimi Shavkat Umurzoqov “O‘zbekiston 24” telekanaliga bergan intervyusida ma’lum qildi.
Uning so‘zlariga ko‘ra, shu maqsadda Xitoy kompaniyasidan 300 million dollar jalb qilgan. Bu mablag‘lar keng ko‘lamli rekonstruksiya va ta’mirlash ishlarini amalga oshirishga yo‘naltirilmoqda.
“Toshkent shahrida 200 kilometr yo‘l va to‘rtta yo‘l o‘tkazgich barpo etiladi”, degan hokim.
Ijtimoiy tarmoqlarda Shota Rustaveli ko‘chasi rekonstruksiyasiga 198 million dollar sarflanishi haqida xabarlar tarqalgandi. Toshkent shahar hokimligi buni rad etib, bu summa poytaxtning 200 kilometrga yaqin yo‘l infratuzilmasini bosqichma-bosqich rekonstruksiya va modernizatsiya qilish uchun mo‘ljallangan dastlabki umumiy hisob-kitobligini bildirdi.
Hokimlik har bir loyiha bo‘yicha yakuniy narx faqat bajarilgan real ishlar asosida shakllanishini ma’lum qildi. Qayd etilishicha, Shota Rustaveli ko‘chasining kompleks rekonstruksiyasi, Amir Temur shoh ko‘chasi, Shahrisabz ko‘chasi, Yangi Sergeli ko'chasining yo‘l va infrastruktura yangilanishi hamda Olmazor tumanida yirik yo‘l obyektining qurilishi birinchi bosqichda 50 million dollarga baholangan.
Shota Rustaveli ko‘chasida, jumladan avtobuslar tezkor harakatlanishi uchun BRT yo‘lagi qurilishi ham rejalashtirilgan.
2024-yil noyabrida Toshkent hokimligi va Xitoyning China State Construction kompaniyasi deyarli 1 milliard dollarlik loyihalar bo‘yicha kelishib olgandi. Uning qariyb 300 million dollarlik loyihasi doirasida poytaxt yo‘l infratuzilmasi yaxshilanishi kerak, yana 259 million dollar esa tirbandlikning oldini olish uchun zamonaviy ko‘priklar qurilishi lozim. Yo‘llar va yondosh obyektlarni modernizatsiya qilish, 200 dan ortiq mutaxassis, jumladan, geodezist va transport muhandislarini jalb qilish rejalashtirilgan.
Izoh (0)