Xitoy va O‘zbekiston o‘rtasida konteyner tashuvlariga ixtisoslashgan UTK International Logistics Co. Ltd qo‘shma korxonasi tashkil etildi. Bu haqda Transport vazirligi xabar qildi.
Qayd etilishicha, 10-iyulda Pekin shahrida “O‘ztemiryo‘lkonteyner” AJ va Xinjiang Union of Railway International Logistics Co. Ltd o‘rtasidagi hamkorlik doirasida ushbu qo‘shma korxona tashkil etilishi munosabati bilan tantanali ochilish marosimi bo‘lib o‘tdi.
Tadbir davomida yangi korxonaning Xitoy va O‘zbekiston o‘rtasidagi transport-logistika hamkorligini chuqurlashtirishdagi strategik ahamiyati alohida ta’kidlandi. Tomonlar mazkur kompaniya o‘zaro yuk tashuvlarini kengaytirishda muhim o‘rin egallashiga ishonch bildirdi.
UTK International Logistics Co. Ltd kompaniyasining ofisi Urumchi shahrida joylashib, korxonaning asosiy faoliyati yuklarni konsolidatsiya qilish, Xitoy tomonidan subsidiyalar jalb etish hamda Xitoy—Markaziy Osiyo yo‘nalishi bo‘yicha multimodal tashuvlarni rivojlantirishdan iborat bo‘ladi.
Tashkiliy jarayonlar yakunlangach, kompaniya qisqa fursat ichida Xitoy—Qirg‘iziston—O‘zbekiston yo‘nalishi bo‘yicha birinchi konteyner poyezdlarini jo‘natishni boshlaydi.
“UTK International Logistics Co. Ltd qo‘shma korxonasining tashkil etilishi Xitoy va O‘zbekiston o‘rtasidagi transport aloqalarini mustahkamlash, shuningdek, O‘zbekistonning logistika sohasidagi strategik o‘rnini yanada kuchaytirishga xizmat qiladi”, deyiladi xabarda.
“O‘ztemiryo’lkonteyner” AJ ma’lumotlariga ko‘ra, mamlakatda 2030-yilga qadar konteyner tashuvlari hajmini kamida 1,5 baravarga oshirish maqsad qilingan.
Xitoyning Gansu International Logistics Group logistika kompaniyasi bilan Xitoy—Qirg‘iziston—O‘zbekiston—Tojikiston / Turkmaniston yo‘nalishi bo‘yicha konteyner poezdlarini yo‘lga qo‘yish bo‘yicha kelishuvga erishildi. Ilk qatnov 2025-yilning uchinchi choragiga rejalashtirilgan.
Izoh (0)