Qashqadaryoda tuproq qoplamali yo‘llarni to‘liq shag‘al qoplamaga o‘tkazish boshlanadi. Bu haqda 20-iyun kuni viloyatni kompleks rivojlantirishning ustuvor vazifalariga bag‘ishlangan yig‘ilishda ma’lum qilindi.
Ma’lum qilinishicha, Qashqadaryoda 3 ming kilometr tuproq qoplamali yo‘l bor. Prezident mutasaddilar oldiga bu yo‘llarni to‘liq shag‘al qoplamaga o‘tkazishni boshlash vazifasi qo‘ydi. Viloyatdagi 9 ta ko‘prikni to‘liq ta’mirlashga topshiriq berildi.
Yig‘ilishda qay etilishicha, G‘uzor—Buxoro—Nukus—Beyneu yo‘lining viloyatdan o‘tgan 100 kilometrini rekonstruksiya qilish hisobiga hududning tranzit salohiyatini 3 karra oshirish mumkin. Bu loyihaga Qarshi shahridagi yangi aylanma yo‘lning qolgan 13 kilometri ham qo‘shilsa, aholi e’tiroziga sabab bo‘layotgan tirbandlik masalasi hal bo‘ladi. Mutasaddilarga bu borada kelgusi yildan amaliy ishlarni boshlash topshirildi.
Shuningdek, Qarshi—Shahrisabz—Kitob magistral yo‘lining 106 kilometrida rekonstruksiyani boshlab, 4 tasmagacha kengaytirish, Qamashi va Yakkabog‘ markazidan aylanib o‘tadigan 34 kilometrli yangi yo‘l qurilishini ham boshlash vazifasi qo‘yildi.
Ushbu 106 kilometr yo‘lning ikki tomoniga kamida 1 millionta daraxt ekib, “yashil belbog‘” barpo etish zarurligi qayd etildi.
Toshkent—Termiz yo‘lining Qashqadaryo hududidan o‘tgan 60 kilometri ham 4 tasmali qilinib, sement-beton qoplamaga o‘tkaziladi. Joriy yilda bu yo‘lning 20 kilometrini qurib bitkazish topshirildi.
Yig‘ilishda Qashqadaryoda viloyat “Islohotlar shtabi” tuzilishi belgilandi. Viloyatda chorvachilikni kompleks rivojlantirish dasturi boshlanadi. Prezident viloyatda ichimlik suvi ta’minoti, uy-joy masalalariga ham alohida e’tibor qaratdi.
Izoh (0)