O‘zbekistobliklar dunyo bo‘ylab kruiz laynerlarida ishlashi mumkin. Bu haqda Migratsiya agentligi xabar berdi.
Keltirilishicha, agentlik rahbariyati va Makedoniyaning Kouzon Corporation kompaniyasi ijrochi direktori Zoran Kochoski o‘rtasida uchrashuv bo‘lib o‘tdi. Unda, kruiz kompaniyalari hamkorlikda mehnat faoliyatini tashkillashtirish bo‘yicha anglashuv memorandumi imzolandi.
Endilikda xorijda ishlash istagida bo‘lgan ingliz tilini biladigan o‘zbekistonlik fuqarolarga turistik kemalarida tashkillashtirilgan tarzda ishga joylashtirish imkoniyati yaratiladi.
Aytilishicha, Kouzon Corporation 28 yildan buyon dunyo bo‘ylab 18 ta davlatda faoliyat yuritmoqda. Laynerlar — O‘rta Yer dengizi, Tinch okeani, Skandinaviya, Boltiq, Karib dengizi kabi yo‘nalishlarda harakatlanadi.
Kompaniya ushbu laynerlarga malakali kadrlarni tayyorlash va ishga joylashtirish bo‘yicha katta tajribaga ega. Yiliga dunyo bo‘ylab 20 000—25 000 gacha mutaxassislarni ish bilan ta’minlaydi. Kemalardagi oylik maoshlar dastlabki 6 oylik shartnomada 1 200 AQSH dollardan boshlanadi, so‘ngra ikki oy ta’til beriladi va keyingi olti oylik yangi shartnomada tajribaga qarab maosh ko‘tarilib boradi hamda 4 000 AQSH dollarigacha yetadi. Yashash bilan bog‘liq xarajatlar kompaniya hisobidan qoplanadi.
Tomonlar kelishuviga ko‘ra, ishlash uchun zarur bo‘lgan C1/D tranzit vizasini olish jarayonlari soddalashtiriladi va ish beruvchi tomonidan 45—90 kun oralig‘ida rasmiylashtiriladi. Uchrashuv yakuniga ko‘ra, mazkur loyihani amalga oshirish bo‘yicha Yo‘l xaritasi ishlab chiqiladi.
Prezidentning “Xorijda mehnat faoliyatini amalga oshirish jarayonlarini tartibga solish bo‘yicha qo‘shimcha chora-tadbirlar to‘g‘risida”gi qarori qabul qilingan.
Qarorga ko‘ra, 2024-yil 1-noyabrdan:
- xorijiy ish beruvchilar tomonidan taklif qilinayotgan ish o‘rinlari haqidagi barcha maʼlumotlar Migratsiya agentligining elektron platformasi, OAV va ijtimoiy tarmoqlarda ochiq eʼlon qilib boriladi;
- agentlikning elektron platformasida fuqarolarga o‘zining rezyumesini shakllantirish va joylashtirish hamda eʼlon qilingan ish o‘rinlari bo‘yicha tanlovlarda erkin ishtirok etish imkoniyati yaratiladi;
- vaqtincha mehnat faoliyatiga chiqib ketayotgan fuqarolarga Migratsiya jamg‘armasi hisobidan 10 million so‘mgacha ikki yil muddatga mikrokreditlar ajratiladi;
- fuqarolarning xorijda ishga joylashishi va “ishchi viza”ga oid hujjatlarini rasmiylashtirish bo‘yicha bepul konsalting xizmatlari ko‘rsatiladi.
2024-yil 1-dekabrdan agentlik tomonidan taʼlim tashkilotlarida xorijga ishga ketmoqchi bo‘lgan fuqarolarni kasb-hunar va chet tillariga o‘qitish bo‘yicha buyurtmalar joylashtirish tartibi joriy etiladi.
Shuningdek, xususiy bandlik agentliklari tomonidan litsenziya olish uchun zaxira qilinadigan mablag‘lar miqdori BHMning 8 500 baravaridan 4 000 baravarigacha tushiriladi.
Izoh (0)