O‘zbekistonlik hamshiralar Bahraynga ishlash uchun yuborilishi mumkin. Bu haqda “Dunyo” xabar berdi.
Keltirilishicha, O‘zbekiston elchisi Nodirjon Turg‘unov (qarorgohi Ar-Riyoz shahrida joylashgan) Bahrayn sog‘liqni saqlash vaziri Jalila bint as-Sayyid Javod Hasan bilan muzokara o‘tkazdi. Unda O‘zbekiston va Bahrayn o‘rtasida sog‘liqni saqlash sohasida hamkorlik aloqalarini mustahkamlash, mutaxassislar almashinuvini yo‘lga qo‘yish va hamshiralarni Bahraynga ishga jalb etish istiqbollari ko‘rib chiqildi.
Vazir Jalila bint as-Sayyid Javod Hasan ikki qardosh mamlakatlar o‘rtasidagi munosabatlarning bugungi holati haqida gapirib, barcha yo‘nalishlarda, xususan tibbiyot sohasida yanada rivojlantirish uchun ishga solinmagan salohiyat borligini ta’kidlagan.
O‘zbekistonning sog‘liqni saqlash sohasida erishayotgan yutuqlari, yosh kadrlarni tayyorlash bo‘yicha samarali natijalari qayd etildi. Shuningdek, ushbu sohada O‘zbekiston bilan yaqindan hamkorlik qilishdan manfaatdorlik bildirildi.
Bahrayn bilan birinchi tibbiy yordam ko‘rsatish va oilaviy tibbiyot markazlarida davolash ishlari yo‘nalishida tajriba almashish xususida fikr almashildi. Bundan tashqari, ikki mamlakat sog‘liqni saqlash idoralari o‘rasida anglashuv memorandumini ishlab chiqish va imzolashni jadallashtirish muhimligi ta’kidlandi.
O‘zbekiston va Bahrayn munosabatlari
O‘zbekiston bilan Bahrayndan rasmiy diplomatik aloqalar 1992-yil 29-mayda Toshkentda qo‘shma kommyunike (bayonot) orqali o‘rnatilgan. Diplomatik, siyosiy, iqtisodiy va madaniy sohalarda yuqori darajadagi muloqot amalga oshirilmoqda.
O‘zbekistonlik hamshiralar AQSHga ishlash uchun yuboriladi
Bu haqda Migratsiya agentligi direktor o‘rinbosari Azimjon Husanov va New Future Succyess Academy xalqaro hamshiralarni tayyorlash o‘quv markazining O‘zbekistondagi boshqaruvchi menejeri Fozilbek Xonxo‘jayev o‘rtasidagi uchrashuvda ma’lum qilingan. 2030-yilgacha AQSHda 1 milliondan ortiq hamshiralarga talab mavjud.
O‘zbekistonda 2018—2023-yillarda aholi daromadining 16 foizi migrantlar ulushiga to‘g‘ri kelgan. Chet ellarda ishlayotgan yurtdoshlar har yili O‘zbekistonga o‘n ikki-o‘n besh milliard dollar jo‘natadi.
O‘zbekistonlik hamshiralar Qatarga ishga taklif qilinmoqda
Jami ish o‘rni 10 ta, ish haqi oyiga 2750 dollarni tashkil etadi. Ish uch smenali tizimda amalga oshirilib, haftasiga 48 soat, 6 kunni tashkil etadi. Nomzodlar uchun shartlar: 18−50 yosh oralig‘ida bo‘lish, tibbiyot sohasida kamida 2 yillik ish stajiga ega bo‘lish hamda ingliz tilini mukammal bilish.
Izoh (0)