O‘zbekistonda bolalarga nisbatan sodir etilgan zo‘ravonlik holatlari yuzasidan 2 ta jinoyat ishi hamda 5 ta ma’muriy ish qo‘zg‘atildi. Bu haqda bolalar ombudsmani axborot xizmati rahbari Dilnoza Yusupova yarim yillik faoliyat to‘g‘risida bergan ma’lumoti davomida xabar qildi.
Unga ko‘ra, joriy yilning 1-yarmida bolalar ombudsmani nomiga 885 ta murojaat kelib tushdi. 665 ta murojaat Bola huquqlari bo‘yicha vakil tomonidan nazoratga olingan bo‘lib, 160 tasi tegishliligi bo‘yicha yuborilgan, 60 ta murojaat takroriy bo‘lgani tufayli ko‘rilmasdan qoldirildi, nazoratga olingan 61 ta murojaat esa ijobiy hal qilindi.
Oliy Majlisning Bola huquqlari bo‘yicha vakili 21 marotaba shaxsiy qabul o‘tkazilib, qabullar davomida 87 nafar fuqaro murojaati qabul qilindi. Bola huquqlari bo‘yicha vakil tomonidan murojaatlarni ko‘rib chiqish, bolaning manfaatlari buzilgani holatlarini o‘z tashabbusiga ko‘ra tekshirish bilan bog‘liq materiallarni umumlashtirish asosida Vazirlar Mahkamasiga 5 ta, Ichki ishlar vazirligiga 4 ta so‘rov xatlari kiritildi.
Umuman olganda, internet monitoringida bola huquqlarining buzilishiga oid 185 ta holat aniqlandi va tegishli davlat organlari bilan hamkorlikda tekshirilib, bundan 60 ta holat bolalarga nisbatan zo‘ravonlikka oid bo‘lib, 16 ta jinoyat ishi hamda 22 ta ma’muriy ish qo‘zg‘atildi.
Ota-onasi va boshqa yaqinlari bergan murojaatlar bo‘yicha 5 nafar bola xorijdan O‘zbekistonga olib kelinishiga, 1 nafar bola o‘z yurtiga, Rossiyaga qaytarilishiga erishildi. Rossiyaning turli hududlarida qarovsiz qolib ketgan 16 nafar bolaga bo‘lib turgan shaharlarida barcha zarur shart-sharoitlar ta’minlanib, so‘ng O‘zbekistonga qaytarildi.
2025-yil 26-may kuni Toshkent shahrida O‘zbekiston Respublikasi prezidenti huzuridagi Ijtimoiy himoya milliy agentligi va BMTning Bolalar jamg‘armasi — YUNISEF hamkorligida davra suhbati tashkil etildi. Konferensiyada “Majburiyatdan harakatga: bolalarga nisbatan zo‘ravonlikka barham berish bo‘yicha strategiya va milliy istiqbollar” mavzusi muhokama qilindi.
2024-yilda O‘zbekistonda bolalar huquqlari buzilishi bilan bog‘liq quyidagi holatlar qayd etilgan:
- 412 nafar bola jinsiy zo‘ravonlikdan jabrlangan;
- 1 028 nafar bola jismoniy zo‘ravonlikka uchragan;
- 929 nafar bola psixologik bosimni boshidan kechirgan;
- 14 nafar bola ekspluatatsiya qurboni bo‘lgan;
- 106 nafar bola kattalarning qat’iy befarq munosabatiga duch kelgan.
Izoh (0)