Angliyaning “Manchester Siti” klubi yozgi transfer oynasida ikkita qanot himoyachisini sotib olishni rejalashtirmoqda. Taniqli jurnalist Fabrisio Romanoning xabariga ko‘ra, “shaharliklar”ning asosiy nishoniga aylangan futbolchilar — “Nyukasl” himoyachisi Tino Livramento hamda “Vulverxempton”dan Rayan Ait-Nuri.
Manbaning yozishicha, “Siti” 23 yoshli Ait-Nurining transferi bo‘yicha muzokaralarni boshlagan va u yaqin orada klubga qo‘shilishi mumkin. Biroq 22 yoshli Livramento bilan muzokaralar hozircha qiyin kechmoqda, chunki “Nyukasl” futbolchini tarkibda saqlab qolmoqchi.
Jamoa rahbariyati har ikki futbolchini tarkibga qo‘shishni istamoqda. Sababi, yakunlangan mavsumda qanot himoyasida yuzaga kelgan muammolar tufayli bir nechta futbolchilar o‘z pozitsiyalaridan tashqarida o‘ynashga majbur bo‘ldi. Chap qanotda Niko O’Rayli, o‘ng qanotda esa Mateus Nunyes muqobil variant sifatida maydonga tushirildi. Bu esa himoya chizig‘ini kuchaytirish zaruratini yanada oshirdi.
Transfermarkt portaliga ko‘ra, Ait-Nurining bozor bahosi 35 million yevroga teng. U joriy mavsum Premer Ligada 37 o‘yinda ishtirok etib, 4 gol va 7 assist qayd etdi.
Livramentoning transfer qiymati 40 million yevro deb baholanmoqda. U esa yakunlangan mavsumda “Nyukasl” safida 37 uchrashuvda maydonga tushib, 1 ta assist muallifiga aylangan.
Izoh (0)