Jahon chempionati saralashi doirasidagi BAA — O‘zbekiston uchrashuvi uchun chiptalar sotuvi boshlandi.
Birlashgan Arab Amirligining Abu-Dabi shahrida o‘tkaziladigan bellashuv uchun chiptalar Ticketmaster.ae sayti orqali sotilmoqda.
OFK reglamentiga muvofiq mehmonlar uchun stadion sig‘imining sakkiz foiziga teng sondagi chiptalar taqdim etiladi. O‘yin o‘tkaziladigan stadion sig‘imi 15 ming ekanligini hisobga olsak, o‘zbekistonliklar uchun taxminan 1200 ta atrofida chipta ajratiladi.
Muhim eslatma: Rasmiy sayt — ticketmaster.ae’da quyidagicha ogohlantirish bor:
“Viagogo kabi uchinchi tomon orqali onlayn xarid qilingan chiptalar haqiqiy emas. Bunday chiptalar egalari stadionga kiritilmaydi.”
Ya’ni ticketmaster.ae saytidan boshqa platformalarda olingan chiptalar bilan stadionga kirish mumkin emas. Shuningdek, o‘zbekistonliklar yoki boshqa xorij fuqarolar boshqa sektorlardan chipta xarid qilsa, stadionga kirish uchun BAA rezident ID kartasi kerak bo‘ladi.
Ma’lum bo‘lishicha, standart sektorlar uchun chipta narxi 20 dirxamga (70 ming so‘m atrofida – tahririyat.) baholanmoqda.
Temur Kapadze jamoasi 8-turdan keyin 17 ochko bilan A guruhida 2-o‘rinni egallab turibdi. “Oq bo‘rilar”ning asosiy raqobatchisi bo‘lgan amirliklar bilan bahs ko‘p narsaga aniqlik kiritadi. Ya’ni O‘zbekiston mazkur bahsda durang natija qayd etsa ham mundial yo‘llanmasiga ega chiqdi. BAA 13 ochko bilan 3-pog‘onani band etgan. Guruh yetakchi Eron esa allaqachon Jahon chempionati yo‘llanmasini qo‘lga kiritgan.
Ma’lumot uchun, BAA — O‘zbekiston 5-iyun kuni Abu-Dabidagi “Al-Nahyan” stadionida bo‘lib o‘tadi. Uchrashuv Toshkent vaqti bilan 21:00 da boshlanadi.
Avvalroq IIBB mazkur bahs oldidan ayrim turistik kompaniyalar “o‘yin chiptasi kafolatlangan” tur paketlar taklif etilayotgani sabab muxlislarni ogohlikka chaqirgan edi.
Izoh (0)