Madridning “Real Madrid” klubi Braim Dias, Rodrigo Goes va Eduardo Kamavinganing transferlaridan 200 million yevro atrofida daromad olishni rejalashtirmoqda. Bu haqda Fichajes nashri xabar berdi.
Manbaga ko‘ra, klub Xabi Alonso qo‘l ostida o‘yin uslubini yangilashni maqsad qilgan. Bu esa jamoa tarkibini qayta shakllantirish va yangi futbolchilarni jalb etishni talab etadi. Shu sababli rahbariyat yuqori nomi keltirilgan uch futbolchi uchun tushadigan takliflarni ko‘rib chiqishga tayyor.
Xususan, argentinalik Franko Mastantuononing transferi ortidan Braim Diasning “Real”dagi kelajagi so‘roq ostida qolmoqda. Jamoa hozirda yosh, tezkor va pressingda faol harakat qiladigan o‘yinchilarga ko‘proq imkon bermoqchi. Agar Diasga Angliya Premyer Ligasi yoki A Seriyadan jiddiy taklif tushsa, klub uni 60 million yevro evaziga transfer qiladi.
Shuningdek, “qirollik klubi” Rodrigo Goes bo‘yicha takliflarni ham ko‘rib chiqishga tayyor. “Real” rahbariyati braziliyalik vingerning narxini 90 million yevroga baholagan. Hozirda unga “Arsenal”, “PSJ” va “Tottenhem” kabi klublar qiziqish bildirmoqda.
Eduardo Kamavinganing ham jamoadagi kelajagi mavhumligicha qolmoqda. Uning salohiyatiga hech kim shubha qilmayapti, biroq u Xabi Alonsoning taktik qarashlariga to‘liq mos kelmasligi aytilmoqda. Agar fransiyalik futbolchi uchun 50 million yevrolik taklif tushsa, klub muzokaralarga tayyor.
Eslatib o‘tamiz, “Real Madrid” o‘tgan mavsumda hech qanday sovrin qo‘lga kirita olmadi. Jamoa La Ligada va Ispaniya Kubogida “Barselona”ga imkoniyatni boy berdi, Chempionlar Ligasida esa “Arsenal” to‘sig‘idan o‘ta olmadi. Ushbu natijalardan so‘ng klub rahbariyati Karlo Anchelottini iste’foga chiqardi va uning o‘rniga Xabi Alonsoni bosh murabbiy etib tayinladi.
Izoh (0)